建築風格
From Wikipedia, the free encyclopedia
建築風格反映咗一個族群嘅文化、生活方式、科技水平、以至思想哲學[4][5]:例如係粵式建築噉,粵式建築其中一個特徵係好興用一啲唔易發霉嘅物料嚟起-反映咗粵人傳統上住喺炎熱潮濕嘅嶺南地區;而且粵式建築包含咗祠堂建築-反映咗粵人同其他唐人一樣,傳統上受到儒家思想影響,有拜祖先嘅習俗[6][7]。
建築風格同一般嘅文化特性一樣,會隨時間變化。建築風格仲可以由一個族群傳播去第個族群嗰度,而喺呢個過程當中,學咗新風格嗰個族群往往會加啲自己嘅元素落去新學返嚟嘅風格:例如文藝復興建築喺大約 1425 年發源自意大利[8],但喺打後嗰兩個世紀傳播到去成個歐洲,令到法國人、德國人同英格蘭人等等開始跟住起文藝復興建築,但同時將自己獨有嘅一啲建築元素混入去佢哋所起嘅建築物嗰度;而 15 世紀之後,歐洲人喺大航海時期將佢哋嘅文化帶到去全世界嗰度,令到(例如)香港同澳門等地都起咗好多西歐風格嘅建築物,而同時,呢啲港澳嘅西歐風建築物有陣又滲雜咗啲粵式建築嘅元素喺入面[9][10]。