哲學
From Wikipedia, the free encyclopedia
哲學(粵拼:zit3 hok6,英文:Philosophy;德文:Philosophie),傳統來講係指關於形上學、知識論、倫理學呢啲方面嘅研究。對於神、世界、知識、對與錯等等嘅觀念,哲學試圖畀出自己嘅答案。基本上,做哲學嘅方法係「運用理性來論證呢啲問題」。祗不過,對於哲學嘅實際範疇同定義,到而家都重未有一個確定答案。「哲學係乜嘢?」喺哲學傳統裡面,關於呢個問題嘅睇法始終係充滿分歧同備受爭議。
「哲學」呢個詞可以追溯到希臘字「Φιλοσοφία」(Philo-sophia),佢嘅意思係「愛好智慧」,或者比較少講嘅「智慧之友」。「哲學」係難以定義,因為有好多觀念都被睇成係哲學,而佢哋之間又有唔少分歧。喺皮爾金哲學辭典度,佢係噉樣定義哲學:「有關思想,行為,同實在中最基本及普遍嘅概念。」而當中亦提到,哲學同科學嘅差別係「哲學問題嘅答案唔能夠凈係由經驗證據得到」。而呢啲觀點又受到牛津哲學辭典嘅挑戰:「二十世紀晚期……偏向於將哲學思考睇成係對於任何一種智識探索嘅最好實踐」。的而且確,唔少早期哲學家喺自然哲學方面嘅觀察,最後都形成咗現代科學裡面眾多課題嘅重要基礎。
另外,哲學比較非正式嘅用法可能係指「一種特別嘅方法或者信念」。