創發
From Wikipedia, the free encyclopedia
創發(粵拼:cong3 faat3 | 英文:emergence),又叫湧現、突發、或者呈現,喺科學同哲學上係指一種現象,指一樣由好多部份組成嘅事物具有一啲佢組成部份冇嘅特性,而且呢啲特性源自組成部份之間嘅互動。好似係水噉,水喺化學上由氫(H)同氧(O)呢兩種化學元素組成,水喺正常溫度同壓力下處於液體狀態,而呢種特性係氫同氧都冇嘅(氫同氧喺正常溫度壓力下會呈氣體狀態)-水具有最少一樣「氫同氧唔具有嘅特性」,而呢樣特性源於氫原子同氧原子之間嘅互動[1][2]。
創發呢個諗頭喺有關複雜系統嘅科學領域上好重要。例如係生命噉,生命具有好多創發性嘅特性,例如係曉繁殖同進化,而呢啲特性係 DNA 嘅組成粒子唔具有嘅,而呢個事實亦都意味住,齋靠物理學同化學研究生命嘅物理化學特性唔能夠完全噉了解生命-所以生物學呢個領域就有必要存在[3]。