அல்டைர் 8800
From Wikipedia, the free encyclopedia
மைக்ரோ இன்ஸ்ட்ருமென்டேசன் அன்ட் டெலிமெட்ரி சிஸ்டம்ஸ் (MITS) நிறுவனத்தின் அல்டைர் 8800 (Altair 8800) 1975ஆம் ஆண்டில் இன்டெல் 8080 மையச் செயற்பகுதியை அடித்தளமாக கொண்டு வடிவமைக்கப்பட்ட நுண்கணிப்பொறி. சனவரி 1975இல் பாப்புலர் எலெக்ட்ரானிக்ஸ் இதழின் முகப்பில் சிறப்பாக காட்சிப்படுத்தப்பட்டதால் இதில் மிகுந்த ஆர்வம் எழுந்தது. மேலும் பல பொழுதுபோக்கு மின்னணுவியல் தொழில்முறை இதழ்களிலும் விளம்பரங்கள் வெளியிடப்பட்டன. தாமே உருவாக்கிக் கொள்ளக்கூடிய கலப்பெட்டிகளை வடிவமைப்பாளர்கள் மின்னணுவியல் ஆர்வலர்களுக்கு விற்க முற்பட்டனர். நூறு கலப்பெட்டிகளை விற்றாலே பெரிது என்று எண்ணியிருந்த காலத்தில் முதல் மாதத்திலேயே ஆயிரக் கணக்கான கலப்பெட்டிகளுக்கு எழுந்த தேவை வடிவமைப்பாளர்களை மலைக்கச்செய்தது.[1] மேலும் கணினித் தேவைப்பட்ட தனிநபர்களும் வணிக நிறுவனங்களும் தயார்நிலை கணினிகளை வாங்கினர்.[2] நுண்கணிப்பொறி புரட்சிக்கான வித்தை அல்டைர் இட்டதாக ஏற்றுக்கொள்ளப்படுகிறது.[3] அல்டைரில் வடிவமைக்கப்பட்ட தரவுப் பாட்டை நடைமுறைப்படி சீர்தரமாக எஸ்-100 பாட்டை (S-100 Bus) என உருவாகியது. இதன் முதல் கணிமொழியாக மைக்ரோசாப்ட்டின் துவக்கநிலை மென்பொருளான, அல்டைர் பேசிக் பயன்படுத்தப்பட்டது.[4][5]