Fracisco de Assis
From Wikipedia, the free encyclopedia
Modelo:Anfo/Santos Giobanni di Pietro di Bernardone, mais coincido cumo San Francisco de Assis (Assis, 5 de júlio de 1182 [1] — 3 d'outubre de 1226), fui un frade católico de la Eitália. Depuis dua mocidade eirrequieta i mundana, boltou-se para ua bida relegiosa de cumpleta pobreza, fundando la orde mendicante de ls Frades Menores, mais coincidos cumo Franciscanos, que renobórun l Catolicismo de sou tiempo. Cul hábito de la pregaçon itinerante, quando ls relegiosos de sou tiempo questumában fixar-se an mosteiros, i cun sue fé de que l Eibangelho debie ser seguido a la risca, eimitando-se la bida de Cristo, zambolbiu ua perfunda eidantificaçon culs porblemas de sous semelhantes i cula houmanidade de l própio Cristo. Sue atitude fui ouriginal tamien quando afirmou la bondade i la marabilha de la Criaçon nun tiempo an que l mundo era bisto cumo eissencialmente malo, quando se dedicou als mais pobres de ls pobres, i quando amou todas las criaturas chamando-las d'armanos. Alguns studiosos afirman que sue bison positiba de la natureza i de l'home, qu'ampregnou l'eimaginaçon de to la sociadade de sue época, fui ua de las fuorças purmeiras que liebórun a la formaçon de la filosofie de la Renacença.[2]
Dante Alighieri dixe qu'el fui ua "luç que brilhou subre l mundo", i para muitos el fui la maior figura de l Cristandade zde Jasus, mas la çpeito de l'einorme prestígio de qu'el çfruta até ls dies d'hoije ne ls círclos crestianos, que fizo sue bida i mensaige séren amboltas an copioso folclore i dáren ourige a inumerables repersentaçones na arte, la pesquisa académica moderna sugere qu'inda hai mui por eilucidar quanto als aspetos políticos de sue atuaçon, i que dében ser mais sploradas las conexones desses aspetos cul sou misticismo pessonal. Sue bida ye reconstituída a partir de biografies scritas pouco passado sue muorte mas, segundo alguns studiosos, essas fuontes primitibas inda stan a la spera d'eidiçones críticas mais perfundas i cumpletas, pus apersentan cuntradiçones fatuales i tenden a fazer ua apologie de sou caráter i obras; assi, deberian ser analisadas sob ua ótica mais científica i mais isenta d'apreciaçones emocionales de l que ten ocorrido até agora, la fin de que sue berdadeira statura cumo figura stórica i social, i nun solo relegiosa, se sclareça. De qualquiera forma, sue posiçon cumo un de ls grandes santos de la Cristandade se firmou anquanto el inda era bibo, i permanece inabalada. Fui canonizado pula Eigreija Católica menos de dous anhos passado falecer, an 1228, i por sou apreço a la natureza ye mundialmente coincido cumo l santo patrono de ls animales i de l meio ambiente.[3]