Testosterona
compuestu químicu / From Wikipedia, the free encyclopedia
La testosterona ye una hormona esteroidea sexual del grupu andróxenu y atópase en mamíferos, reptiles,[1] aves[2] y otros vertebraos. Nos mamíferos, la testosterona ye producida principalmente nos testículos de los machos y nos ovarios de les femes, y les glándules suprarrenales secretan tamién pequeñes cantidaes. Ye la principal hormona sexual masculina y tamién un esteroide anabólico.
Alvertencia: Wikipedia nun ye un consultoriu médicu nin farmacolóxicu. Si piensa que precisa ayuda, por favor, fale con un profesional de la salú. |
Nos varones, la testosterona xuega un papel clave nel desenvolvimientu de los texíos reproductivos masculinos como los testículos y la próstata, y tamién na promoción de los calteres sexuales secundarios como, por casu, la medría de la masa muscular y ósea y na crecedera del pelo corporal.[3] Amás, ye esencial pa la salú y el bienestar,[4] amás de la prevención de la osteoporosis.[5]
En permediu, la concentración de testosterona nel plasma sanguineu nun adultu humanu masculín ye diez veces mayor que la concentración nel plasma d'adultes humanes femenines, pero como'l consumu metabólicu de la testosterona nos homes ye mayor, la producción diaria ye d'aproximao 20 vegaes mayor nos homes.[6] Amás, les muyeres son más sensibles a la hormona.[7]
La testosterona ye caltenida al traviés de la mayoría de los vertebraos, anque los peces producen una llixeramente distinta llamada 11-cetotestosterona.[8] El so homólogu nos inseutos ye la ecdisona.[9] Estos esteroides ubicuos suxuren que les hormones sexuales tienen una historia evolutiva antigua.[10]