Informel
From Wikipedia, the free encyclopedia
D Informel oder informelli Kunst (franzöösisch art informel) isch e Sammelbegriff für d Stiilrichdige in dr abstrakte (im Sinn von ere nit-geometrische, geegestandsloose) Kunst in Öiropa noch em Zwäite Wältchrieg. Si het iiri Ursprüng im Bariis vo de 1940er und 1950er Joor ghaa.
D Informel isch nid dur en äihäitlige Stiil charakterisiert sondern dur si künstlerischi Haltig, wo s klassische Form- und Komposizioonsbrinzip genauso ableent wie die geometrischi Abstrakzioon.[1] S Brinzip vo dr Formlosigkäit im Spannigsfäld vo dr Uflöösig und vom Wärde vo dr Form isch konstitutiv.[2] Under em Begriff Informel wärde verschiideni abstrakti Ströömige in dr öiropäische Noochchriegskunst zämmegfasst. Noch em Rolf Wedewer schliesst er zwäi verschiidnigi Usdruckswiise ii – s Gestische und d Texturologii.[3]
Dr Kunstkritiker Michel Tapié het dr Naame art informel für e Bariiser Usstellig im Studio Facchetti im Novämber 1951 brägt, won er ere der Ditel Signifiante de l'informel gee het.[4] Vor allem in dr Früezit het mä au d Bezäichnig Daschismus brucht, wo dr Kunstkritiker Pierre Guéguen brägt het.[5] En andere sünonüme Begriff is Lürischi Abstrakzioon.