中山市

中山（粵拼：zung1 saan1），喺中國廣東，舊稱香山。家下佢係一個地級市，叫中山市。中山原本係個島，又係個縣。大清時叫香山縣，民國時改叫中山縣，以紀念國父孫文（別名孫中山）。個島因珠江三角洲沖積，家下連埋大陸。原縣包埋今日珠海市同埋澳門^[1]。

乾隆時，中山叫香山縣，喺省城南便，歸廣州府

地理

山

中山北面有浮虛山，曾經係島山，係道教要地^[2]，東南有五桂山，就係原香山個位，今日係響中山市同珠海市交界^[1]。原縣重包埋濠鏡澳山，響家下澳門境^[1]。

水

中山縣東南靠海。原縣同澳相接，有濠鏡澳關，西便叫拱北灣^[1]，家下響珠海市境。原縣重有海裏便嘅東澳山、九星山，周圍叫九星洋^[1]。又有老萬、九澳、橫琴、三灶、浪白諸島喺海度^[1]，除咗九澳係澳門路環，全部都劃咗畀珠海市。

中山西北板沙海，水由順德入，東南去到潭洲^[1]。而另一支仰船水，經木頭海，再向東南流入海^[1]。西江由順德流入，到古鎮海，東南去到螺洲，夾埋石岐水，向南出磨刀門入海^[1]。

史

舊時中山叫香山。

大唐東莞縣置香山鎮。大宋紹興廿二年，卽係一一五二年，置香山縣，喺東莞縣隔海三百里，叫香山係因爲當地有山，多神仙花卉^[3]。亦有謂香山取名自香爐山，喺香山縣治南六十里，有瀑布^[4]。

大清嗰陣，香山縣歸廣州府。縣丞駐前山寨城^[1]。都司、巡檢駐黃梁都城^[1]。另有三巡司駐淇澳、香山、黃圃^[1]。光緒十三年，澳門正式落入葡萄牙^[1]。宣統元年奏開香洲商埠^[1]。

中華民國十四年，一九二五年，孫文逝世，爲咗紀念佢，用佢日本時名號中山，改縣名爲中山。

一九八三年，中華人民共和國，改縣做地級市，叫中山市。

行政區劃

中山市轄下有15個鎮（黃圃鎮、南頭鎮、東鳳鎮、阜沙鎮、小欖鎮、古鎮鎮、橫欄鎮、三角鎮、港口鎮、大湧鎮、沙溪鎮、三鄉鎮、板芙鎮、神灣鎮、坦洲鎮）、8個街道（石岐街道、東區街道、西區街道、南區街道、五桂山街道、中山港街道、民眾街道、南朗街道），區域內含有1個國家級開發區——中山火炬高技術產業開發區和1個經濟協作區——翠亨新區。

註

1. 清史稿。志、地理、廣東
2. 〈浮虛山〉。
3. 《太平寰宇記》卷一百五十七、香山在縣隔海三百里、地多神仙花卉、故曰香山。呢度縣指東莞。
4. 《讀史方輿紀要》卷一百零一、香爐山、在縣南六十里、有瀑布懸流。志云、縣以此山爲名。