選舉(英文:Election),係一種正式嘅決策過程,喺呢個過程裡面會由選民投票,選出某個職位嘅擔當人選,或者作出某項適用於成個組織嘅決定。所以,選舉嘅性質係有別於其他選擇方法,例如比賽篩選、隨機決定或者市場決定。
喺實行代議民主制嘅國家同地區,會透過選舉決定議會成員、國家元首同政府首腦(總統、總理、首相)嘅相關人選,亦會用佢來選出地方政府嘅行政官員。另外,民間團體、學校同埋公司,一般來講亦都採用選舉作為人事決策嘅手段。
選舉又可以分為大選同補選,前者通常係定期進行而且選出一個政治機關嘅全部/大部份空缺,後者就只會選出一個或者少量嘅空缺。