![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/c/cc/Ngomon2.jpg/640px-Ngomon2.jpg&w=640&q=50)
越南民族
越南民族狀況介紹 / From Wikipedia, the free encyclopedia
越南民族(粵拼:jyut6 naam4 man4 zuk6;越南文:dân tộc Việt Nam/民族越南)係指生活喺越南領土上嘅各個民族,按國籍講,可以稱爲越南人(jyut6 naam4 jan4;người Việt Nam/𠊛越南),簡稱越人(người Việt/𠊛越)[註 1]。
Quick Facts 越南文化 系列文章 ...
Close
越南係個多民族國家,現時越南政府認證嘅民族有54個,外加一組「外國人」[1]。最大嘅民族係京族,又稱爲越族,「越南人」呢個詞除咗表示國籍越南嘅人外,民族層面上多指京族人[註 2]。京族作爲主體民族,佔越南總人口嘅85.7%(2014年)[2]。不過京族內部有族群對立,由於越南曾經分裂爲南北兩個政權,北部同南部嘅京族人有唔同嘅歷史背景[註 3],直到而家,南北兩地嘅京人重係有政治、經濟上嘅對立意識,呢種地域矛盾對越南政治影響深遠。除咗呢個主體民族,越南有好多個少數民族,呢啲少數民族有佢哋自身嘅語言、文化,其中占族比較特別,因爲佢哋歷史上有自己嘅獨立國,但後來畀越南征服吞併,占族亦都吸收成爲越南民族。京族、占族、華族、高棉族住喺越南平原地帶,稱爲平地人,而更多嘅少數民族住喺山區,稱爲山地人,近來越南爲咗解決平原地方人口密集問題,亦爲咗促進山區發展,當局鼓勵平地人移居山區,試圖民族融合,但平地人同山地人有別嘅觀念未變到[4]。呢啲山地民族比較細,未建立過自己嘅國家。
據1999年嘅越南人口調查,京族(越族)佔86.2%,齊族佔1.9%,芒族佔1.5%,下高棉人(高棉族)佔1.4%,華族佔1.1%,儂族佔1.1%,苗族佔1%,其他民族佔4.1%。