顧太清

顧太清（1799年—1877年，嘉慶四年己未正月初五─光緒三年丁丑十一月初三）係大清滿洲鑲藍旗人，係嗰陣時拍得住納蘭性德嘅詞人。本來佢係西林覺羅氏嘅，原名鄂春，後尾改姓顧，名春，字梅仙，亦字子春，道號太清，晚號雲槎外史；佢重成日叫自己做太清春、太清西林春、雲槎外史。

顧太清
姓名原文	顧春
出生日	1799年
出生地	北京
死亡日	c. 1877年
國籍	大清
母語	中文
識嘅語言	中文
職業	詩人、作家
配偶	Yihui
仔女	Zaizhao、Zaichu
[改維基數據]
睇 傾 改

身世同生平

顧太清係清初大學士文端公鄂爾泰個侄甘肅巡撫鄂昌個孫女。太清好細時，阿爸阿媽就死咗。雍正、乾隆時，鄂爾泰同張廷玉兩派成日鬥來鬥去，太清阿爺鄂昌就係咁受到胡中藻嘅詩獄株連，重逼到要自盡，連家產都充公埋。

太清後生時好辛苦，要由京都流落咗去江南，重喺閩、粵遁嚟遁去，住過下蘇、杭。太清廿六歲結婚，但只係做人細婆。鄂家想洗清「罪人之後」呢個唔光彩嘅背景^[1]，就借啲意話太清係榮府護衛個女，重偷偷地同佢改埋姓顧。

太清老公係奕繪（1799年─1838年，清嘉慶四年己未正月十六日─道光十八年戊戌七月七日），字子章，又叫做幻園居士，係清高宗乾隆第五個仔榮純親王永琪個孫、榮恪郡王綿億個仔。永琪個老婆，係鄂爾泰個仔鄂弼個女，所以太清、太素兩公婆一早就有親戚關係，佢哋間中都有來往下；咁都未算，佢哋呢啤都好鍾意詩詞，間唔中都唱和下，收尾重結埋婚。太清有七十九歲命。

藝術特徵

太清成日用詩記事，用詞講情。佢嘅作品有三種特徵：

• 文筆同意義上，講求語言通俗易明，文筆簡潔流暢，唔多用典；無乜咬文嚼字，但字裏行間就流露出深刻嘅含義。佢嘅作品咁感人，唔使講都知佢叻喺邊嘞。
• 神緒同埋境界上，響形同神、景同情、事同理呢啲範疇，由淺入深，由表及裏，由近到遠，由細見大。咁樣來達到渾然一體嘅境界。
• 結構同埋靈氣方面，唔執着一字一句嘅尖巧，但講求成篇嘅結構同埋靈氣，要一波三折、一氣呵成，渾然一體咁樣。

學術成就

太清、太素兩公婆，詩詞都叻，書畫又掂，重中意吟詠。佢哋兩公婆酬唱嘅作品，感情深，數量又大，係中國文學史上罕見嘅。

太清好出名，開講都有話「滿族詞人，男中成容若（納蘭性德），女中太清春」。太清一二十歲就開始寫詩，經歷過嘉慶、道光、咸豐、同治、光緒足足五朝，嗰時清代由盛轉衰；重有，佢充分體現過滿族官宦人家嘅奢華、人間嘅艱酸、婚姻嘅美滿，以至後期嘅孤寡。所以，佢咁豐富嘅詩詞創作，就反映咗人生際遇、社會狀況，同埋個人嘅思想情懷嘞。佢嘅作品重紀錄咗封建滿族家庭嘅盛衰變遷，就係咁，佢六十年嚟嘅創作生涯就有好大嘅成就嘞。

太清寫過《天遊閣集》、《東梅漁歌》、《紅樓夢影》等等嘅詩詞同埋一啲小說留傳後世。

註

1. 有個講法係，太清避忌滿人漢化，同埋姑侄結婚呢件事，所以改姓顧。 互聯網檔案館嘅歸檔，歸檔日期2021年3月1號，. 又有種講法，佢由蘇州姑姐嗰家人湊大，就跟埋姑丈姓顧。 互聯網檔案館嘅歸檔，歸檔日期2007年9月28號，. 但係，呢啲講法都唔妥。（參考《顧太清 奕繪合集》）

參考

• 《顧太清 奕繪合集》，[清]顧太清、奕繪著，張璋編校，上海古籍出版社

睇埋

• 奕繪
• 鄂爾泰
• 納蘭性德
• 詞人

出面網頁

維基文庫入面呢位作者嘅作品：

顧太清

• 劉素芬，〈文化與家族--顧太清及其家庭生活〉