立憲民主黨 (日本)

立憲民主黨（日文：立憲民主党／りっけんみんしゅとう ^{Rikken minshu tō}；英文：The Constitutional Democratic Party of Japan）曾經係日本最大在野黨，屬中間偏左。黨代表係枝野幸男。2020年吸收咗大部分舊國民民主黨嘅議員，成立新嘅立憲民主黨。

立憲民主黨

黨史

2017年9月，日本首相安倍晉三宣佈解散眾議院重新大選。當時嘅最大在野黨民進黨黨魁前原誠司見到黨內頹勢未止，就同新成立嘅希望之黨黨代表小池百合子提出合作，唔會用黨嘅名義提名黨員出選。務求借小池當時嘅強勢整合反對力量，推翻安倍政權。但係小池之後就話唔會全部吸納民進黨嚟嘅候選人，排斥自由派。最後黨內嘅自由派決定出走。立憲民主黨就係喺咁嘅背景下成立。

10月3號，立憲民主黨正式成立。黨名用返之前民主黨同維新黨合併時落選嘅黨名提議——「立憲民主黨」。

第48屆日本眾議院議員總選舉，立憲民主黨決定同社民黨、共產黨合作。選舉結果出乎意料咁好，贏咗55席。比例區嘅總得票重要高過希望之黨，成為最大反對黨。不過，立憲民主黨亦係日本戰後最蚊型嘅最大反對黨。

之後民進黨試過計劃同立憲民主黨以及希望之黨組成一個統一嘅院內會派（黨團）合作，結果因為立憲民主黨反對而不得要領。希望之黨就繼續同民進黨傾，點知民進黨有啲參議員因為修改憲法等等嘅議題唔夾，唔想同希望之黨組成統一會派，繼而走咗嚟立憲民主黨。後來統一會派嘅提議始終冇成功到。

2018年3月至5月，民進黨同希望之黨喺組成統一會派唔成之後，反而達成咗合併嘅建議，目標係團結反對派力量。立憲民主黨本來都係合併對象之一，但係黨代表枝野幸男拒絕咗。至於決定合併嘅雙方，好多議員都唔妥合併嘅做法，民進黨入面唔想合併嘅多數加入咗立憲民主黨或者加入佢哋嘅統一會派。

最後，新合併成嘅國民民主黨始終做唔成第一大反對黨，而立憲民主黨就因為民進黨兩次同希望之黨合作而增加咗唔少黨員。

2019年1月8號，主要由前民進黨員組成嘅院內會派無所屬之會宣佈，以岡田克也為首嘅9個眾議院議員會以獨立身份加入立憲民主黨嘅院內會派，16號正式加入。無所屬之會剩低嘅4個就參埋另外3個獨立議員，改名做「重建社會保障國民會議」。

到7月嘅參議院改選，立憲民主黨依然有斬獲，但係成績冇上次眾議院選舉咁亮眼，尤其是比例區得票跌咗足足300萬票，得票率亦都跌咗3%，令到原本抗拒在野黨合併嘅立憲民主黨態度軟化。到咗9月，包括立憲民主黨、國民民主黨等嘅在野黨派合組成統一會派。10月嗰時，立民黨同國民黨已經開始為合併交換意見，2020年嘅1月，合併建議畀國民黨否決咗，結果合併一事就擱置咗。與此同時，參議院嘅統一會派入面又鬧不和，但係到後來都冇解散到。

到7月，兩黨再次就合併評判，到8月終於有共識，兩個黨會喺9月合併。不過國民民主黨嗰邊就分成兩派，一便支持合併，另一便因為政見等理由傾唔掂數，佢哋會另外組成一個新黨。

合併之後嘅新黨有106個眾議員同43個參議員參加，立憲民主黨呢邊絕大部分人會加入新黨，除咗之前因為東京都知事選舉同黨鬧過交嘅須藤元氣。

9月10號，合併嘅新黨舉行黨代表選舉，由原先立憲民主黨嘅代表枝野幸男做返，新黨嘅黨名亦都決定用返「立憲民主黨」。9月15號，新嘅立憲民主黨組成。

睇埋

• 自由民主黨
• 民進黨
• 希望之黨
• 國民民主黨