神經編碼
From Wikipedia, the free encyclopedia
神經編碼(粵拼:san4 ging1 pin1 maa5;英文:neural coding)係神經科學嘅一個子領域,專門研究神經細胞(neuron)點樣對外界刺激有反應,以及神經細胞射嗰啲訊號點樣表達佢哋所帶嗰啲資訊嘅內容:一隻脊椎動物嘅感官會無時無刻噉對外界刺激起反應-眼會感應光、耳仔會感應聲,呢啲感官嘅感覺神經細胞會向個腦射訊號,個腦跟住會對啲訊號作出處理,並且射返啲(同個腦收到嗰啲訊號唔同樣嘅)新訊號落去身體嘅各部份嗰度,教身體嘅肌肉同腺作出適當嘅反應[1][2]。
喺呢個過程當中,神經系統做咗將訊號轉化嘅工作,即係話一粒神經細胞射嘅訊號實會同佢所受嘅刺激成某啲關係:定義上,一個訊號實係會同佢所測量嗰個物理量成特定嘅函數(簡單講即係成一個特定嘅數學關係),所以睇訊號嘅嗰方先有可能知道個訊號係傳達緊啲乜嘢資訊[3][4];舉個例說明,一粒感光細胞(視網膜上對光起反應嘅細胞)射嘅訊號嘅物理特性 (例如係頻率同時間差)一定係同佢感應到嘅光嘅某啲物理特性 (例如光嘅亮度或者色水)成特定嘅關係,否則接收訊號嗰一方(個腦)唔會有可能憑訊號嘅物理特性解讀訊號傳嘅資訊[5]。
神經編碼想做嘅嘢大致上就係想拆解神經系統嘅呢啲函數:研究神經編碼嘅科學家會係噉做實驗,睇吓唔同嘅刺激會引起乜嘢規律嘅神經細胞訊號,靠噉嚟研究神經系統係點樣將資訊編碼(coding)嘅-即係想「將個腦解碼」[6][7];而呢啲研究所得嘅知識可以配合光遺傳學等嘅技術用嚟醫治神經性嘅疾病[8][9]。