沙田馬場
From Wikipedia, the free encyclopedia
沙田馬場(Sha Tin Racecourse),係香港第二個賽馬場地,位於新界東部嘅沙田區,由香港賽馬會起同埋管理,1978年10月7號落成啟用。沙田馬場有草、泥地賽道共三條,草地跑道闊30.5米,1周長約1900米,容量為85,000人。場地水準世界一流,亦係亞洲頂級嘅賽馬場地。現時每年都舉行多項國際大賽,並吸引來自世界各地嘅頂級人馬喺呢處互相角逐。
沙田馬場設有兩座看台,分為會員席及公眾席。會員席招待會員同來賓,公眾席就開放畀公眾人士,入場費10港紙。看台設有投注大堂,飲食設施等,會員席亦設有會員,馬主廂房等設施。場內設有全球最闊嘅彩色大屏幕,長70.4米,面積相當於4,500部架疊起嚟嘅52厘米電視機,詳盡顯示每一場賽事嘅資料同賽果。喺看台旁邊嘅沙田會所,就為會員提供飲食同康樂設施。馬場其他設施包括馬房,騎師、練馬師同馬伕宿舍等,另有一座行政大樓畀馬會用。
馬場交通方便,港鐵東鐵綫馬場站設有蓋行人天橋直達馬場,賽馬日亦有各線巴士直達,馬場內亦有地方畀紅色小巴及市區的士停放或載客。
沙田馬場參考世界先進馬場嘅設計,跑道屬古典英式嘅順時針方向,佈局同美國貝蒙園(Belmont Park)同聖雅尼塔(Santa Anita)馬場接近,為看台觀眾提供更廣闊嘅視野。馬場中央係景色秀麗嘅彭福公園,為市民提供休憩空間。