From Wikipedia, the free encyclopedia
沙士病毒2型(英文:SARS-CoV-2,全名嚴重急性呼吸系統綜合症冠狀病毒2型),曾經叫2019新型冠狀病毒(英文:2019-nCoV[1][2]),係一種單鏈RNA病毒冠狀病毒,可引致武漢肺炎。
呢篇文記述緊一項時人時事。 內容會隨住件事發展而變動或者更新。 |
維基百科嘅醫學類文章只係提供參考,並唔係醫療意見。 閣下如果有任何關於健康嘅問題,請諮詢專業醫護人員。 |
2019–2020年武漢肺炎爆發期間,喺對肺炎陽性患者樣本進行唨核酸檢測與及基因組測序之後,研究人員發現唨邇一種病毒。喺武漢肺炎疫情爆發嗰陣時仲未有針對種新病毒嘅具體治療方法,但使用已有嘅抗病毒藥物進行治療都得。2020年1月19號,世界衛生組織發言人乍沙利域(Tarik Jasarevic)話已有證據表明唨個新型冠狀病毒可有限度人傳人,同時補埋話仲未有明確證據顯示人際間有持續傳播,之不過於2020年1月20號晚,國家衞健委高級別專家組組長鍾南山表示,種病毒已證實有人傳人同埋醫務人員感染嘅情況。
流行病學研究估計,如果社區之中冇免疫力,同埋冇做預防措施,每個病人可以感染 1.4 至 3.9 個人。病毒主要傳播方法係緊密接觸、咳或者打乞嗤形成嘅飛沫[3][4]。病毒黐咗受體血管緊張素轉化酶2(ACE2)而入侵人體細胞[5][6]。
呢隻病毒當初發現嗰陣,世界衛生組織以2019年底發現做基礎,暫時叫佢做「2019新型冠狀病毒」(2019-nCoV)。2020年2月11號,國際病毒分類委員會正式定名做「沙士病毒2型」(SARS-CoV-2)[7][8],而2003年發現嘅「沙士病毒」就改叫「沙士病毒1型」。
另外,皆因呢隻病毒引發嘅病經常畀人叫做武漢肺炎,所以病毒又畀人叫做「武漢冠狀病毒」(Wuhan coronavirus)或者「武漢肺炎病毒」(Wuhan pneumonia virus)[9],簡稱WARS或者「窩士」。當勞侵曾經叫隻病毒做中國病毒(Chinese virus)[10]。法輪功創辦嘅傳媒就叫佢做中共病毒[11][12][13]。
主流病毒學研究認為,沙士病毒2型係蝙蝠同穿山甲生態裡面自然存在嘅病毒,喺宿主身上合併變異嘅結果。
俄羅斯衛生部2月後期發佈過一份官方報告,報告話個病毒係屬於RNA嘅單鏈病毒,歸類係β-CoV,同沙士、MERS係同一家族。而報告又話遺傳序列同沙士有成7成相似,認為「可能係蝙蝠冠狀病毒,同未知病毒重組而成嘅」[14]。
一隊美國、英國、澳洲專家團3月喺《自然》期刊發表評論,發現病毒嘅基因嘅組成部分,係蝙蝠冠狀病毒、穿山甲冠狀病毒,同其他人類冠狀病毒合併嘅結果。佢哋認為穿山甲病毒基因解釋埋之前未解釋到嘅病毒基因成份,否證咗沙士病毒2型係故意人工合成嘅講法。佢哋相信,沙士病毒2型出現嘅原因係蝙蝠冠狀病毒同穿山甲冠狀病毒喺某宿主身上合併,然後因為呢種合併病毒超易感染人類,所以就因為物競天擇而大規模流行[15]。
喺《新英格蘭醫學期刊 》發表嘅研究指,喺實驗室環境下貓可容易感染導致武漢肺炎嘅沙士病毒2型,並有機會將病毒傳到其他貓身上[16]。
變種 | 學名 | 俗名 |
---|---|---|
沙士病毒2型Alpha變種 | B.1.1.7譜系 | 英國變種病毒 |
沙士病毒2型Beta變種 | B.1.351譜系 | 南非變種病毒 |
沙士病毒2型Gamma變種 | P.1譜系 | 巴西變種病毒 |
沙士病毒2型Delta變種 | B.1.617.2譜系 | 印度變種病毒 |
沙士病毒2型Omicron變種 | B.1.1.529譜系 |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.