江湖

  「武林」跳轉到呢度。想搵其他用法，請睇「武林 (搞清楚)」。

江湖係一種中國民間社會，多數講係遠離官方嘅民間組織同勢力，有自己一套規矩，有時甚至漠視法律。江湖有說起源自周圍去賣藝、賣武技人，成日經水路來往各個江湖。因為到處維生，唔容易俾官府管，後尾產生武俠、武林、黑社會嘅意思。古代中國雖然係中央集權制，但係地方治安好多時都係靠民間組織自保，所以有江湖發展嘅空間。

廣義嘅解釋

江湖有好多意思。因為有武俠小說嘅流行，唔少人會覺得，以前嘅江湖一定係關於武林，有好多武林高手不斷以命相搏想成為天下第一，而今日嘅江湖就一定係同黑幫有關，幫會之間互相鬥爭廝殺要成為最高霸主，總之就係充滿血腥嘅地方；但原來江湖唔一定係以上呢兩種，唔一定有血腥，可以咁講：喺同一個領域裏面活動嘅人，不論國界，不分膚色，總之佢哋之間係存在競爭，唔理係生存抑或名利之爭，良性定係惡性之爭，都可以稱嗰個領域為一個江湖。

概念

江湖照字面睇係「江川」同「湖泊」嘅合稱，裏面匯合咗來自唔同地方嘅水，當水入咗江、湖之後，不論流向、遭遇都冇人會知道；有可能被人挑咗去種田，有可能俾動物飲，俾植物吸收咗，又可能會被蒸發變成水蒸氣消失喺江、湖中……。

將呢個概念引申出嚟，將江湖比喻為一個群體小社會，而擁有相同或類似目標嘅人就好似江湖中嘅好多好多滴水，不斷喺個小社會裏面打滾，為喺呢個空間生存而迎接一切嘅挑戰，冇人會知道當自己入咗江湖之後會遇到咩遭遇，亦唔知有咩後果，會闖出名堂？定係寂寂無聞而無聲引退……？

所以一路以嚟都有好多唔同嘅句子詞語同江湖有關，好似：

• 「名震江湖」：即係喺一個領域裏面打出名堂，個大名全天下人都聽過；
• 「江湖路險」：即係話個領域危機四伏，要力爭上游係會遇到好多危險；
• 「血染江湖」：即係喺個領域裏面中咗招；
• 「江湖不歸路」、「人在江湖，身不由己」：有好多領域唔係話可以話唔玩就唔玩，入咗去就冇得返轉頭；又或者有時有啲嘢係好想做，或者好想退出，但係身邊嘅嘢令到自己唔可以話想點就點，冇選擇餘地。

……等等。

相關嘅書刊同媒體產品

喺香港有一套名為江湖嘅電影，係講關於香港黑社會嘅故事；由香港藝人劉德華同埋張學友主演。

至於香港武俠小說家金庸（原名查良鏞，人稱查大俠），其中亦有一部作品叫做【笑傲江湖】。要解釋呢個書名嘅意思，其實即係「輕鬆寫意咁喺武俠嘅領域裏面生存」；當然如果話真係想「笑傲江湖」，咁必須要有一身嘅真本事先得啦。

相關詞語

港澳傳媒興用江湖猛人、江湖人士同猛人嚟委婉噉代表「黑社會中人」。