江戶幕府,又叫德川幕府(えどばくふ、Tokugawa Shogunate / Tokugawa Bakufu),係日本歷史裏面最後一個幕府,喺江戶城(今東京)所以有呢個名。由德川家康1603年受封征夷大將軍開始,直到1868年明治天皇期間,到將軍德川慶喜大政奉還為止。
喺江戶幕府時期,將軍實際係權力最大嘅人。幕府行封建制,為防諸侯造反,將軍用「朝覲交替」制度,命令諸侯經常回京覲見,除咗令佢哋嘥好多錢喺旅費之上,亦令到佢哋無時間組織叛變。
俸祿有成一萬石以上嘅武士叫做「大名」,相當於中國古代嘅諸侯,大名嘅種類可分三種:
- 親藩大名:
德川一族嘅親藩大名,用嚟保護京城安全,家康嘅九男、十男、十一男合稱御三家:尾張家、紀州家、水戶家;只要係軍事要地、政治重心和經濟富饒地區,皆安置親藩大名。
- 譜代大名:
豐臣秀吉死前投降嗰啲,德川封為譜代大名,喺社會上有一定嘅地位,好似本多正信、大久保忠鄰。德川家康設計幕府統治必須完全由親藩同譜代大名操控,外樣大名不得參與。
- 外樣大名:
豐臣秀吉死後,關原之戰結束之後臣服嘅,德川封為外樣大名,好似伊達政宗、藤堂高虎;呢啲大名離京畿最遠,最靠近外海,如果呢啲大名要叛變必先經過自己親屬以及家臣嘅領地。