水貨
From Wikipedia, the free encyclopedia
水貨,雅稱平行進口貨,係指通過合法或唔合法嘅渠道,繞過當地貨物嘅總代理而入口嘅貨物,通常水貨係冇原廠保養嘅。有代理同保養嘅叫「行貨」。
水貨有別於冒牌貨、A貨/B貨(假貨),或者老鼠貨(偷返嚟賣嘅正貨),本地嘅水貨係某外地嘅原裝正貨。水貨嘅售價通常平過行貨,但係有啲情況下水貨會貴過行貨,例如當行貨有排都未輪到某地區賣而當地又好多人想要,噉樣水貨就會貴過行貨嘞,基本上係睇地區需求嚟定價錢,買賣某啲水貨,位於接近走私嘅灰色地帶——可以由外地帶入境自用,不過轉賣畀人哋就犯法。
水貨貿易通常會令到政府收少咗稅,亦都搶走咗正式代理商嘅生意,重可能會拖低行貨價格以及影響其銷路;買水貨嘅多數係食得鹹魚抵得渴之徒,皆因商販多數會坦誠噉樣話畀客人知道有乜嘢風險,甚至代替正式代理商,提供條款稍遜嘅維修服務。