欽廉地區白話
From Wikipedia, the free encyclopedia
欽廉地區白話,舊學術劃分上統稱為「欽州白話」[1],母語者口頭上直接叫做「白話」又或者「城市名字+話」,係對一種內部差異冇幾大,散點分佈喺欽廉地區沿江、沿海等某啲政治、商業中心嘅粵語變體嘅統稱。發音上相對接近廣州話多啲[2],更加接近鄰近地區啲同樣屬於市鎮白話嘅粵語變體,譬如湛江白話、南寧白話、高州白話、茂名白話等等。具體分佈喺欽州城區同埋附近鄉鎮、防城城區、東興、靈山縣城與及下轄墟鎮似武利等、浦北縣城小江(戥小江話並存)、北海城區同埋鐵山港區等埞。
代表音包括欽州城區白話、防城白話、靈城白話、北海城區白話,與及東興白話、武利白話、浦北白話、南康白話等,仲有域外越南芒街白話同埋曾經在域外嘅僑港白話[註 1][3]等。
有拏褦噶河口廣話着認爲係欽廉廣府混合腔,撈欽廉移民有關,都着分類成欽廉片。另外北海疍家話屬廣府欽廉混合腔,母語者係蜑家人、集中喺北海外沙,缺少舌面鼻音撈邊擦音等、音韻接近廣州話而且混併N-L。
傳統上啲白話歸為欽廉片[4]。有啲學者根據語音特點認為應歸粵海片[5][6]、高陽片[7]或者同粵海片有直承關係、近似嘅其他分片(譬如「沿江白話片」[8])。