公曆

公曆（粵拼：gung1 lik6）即係世界上大多數地方用嘅曆法；當今嘅公曆係國瑞曆（gwok3 seoi6 lik6），又譯格里曆（gaak3 lei5 lik6）、額我略曆（ngaak6 ngo5 loek6 lik6）、格列高利曆（gaak3 lit6 gou1 lei6 lik6），不過粵口語多數叫新曆。呢套曆法喺1582年由教宗國瑞十三世喺歐洲頒佈推行，個名嘅 ｢國瑞｣ 亦即係佢^{[註 1]}，但係套曆法其實並唔係佢發明，而係由意大利醫生兼哲學家阿萊紹斯·列廖斯（Aloysius Lilius）透過改革儒略曆而整出嚟嘅。

1582年嘅公曆年曆

有乜特別

國瑞曆同儒略曆一樣，都係每四年喺二月底加一個閏日，不過，國瑞曆特別規定，所有唔可以畀 400 整除嘅世紀年（即有兩個零喺尾嘅年份，1800年、1900年之類）都冇閏日。其他可以畀 400 整除嘅世紀年就有閏日，好似1600年、2000年咁，所以2000年係有2月29號。

國瑞曆每 400 年只係得 97 個閏年，比儒略曆少 3 個，所以國瑞曆嘅年平均長度係 365.2425 日，接近平均回歸年嘅 365.24219 日，即係約每 3300 年先有一日誤差，亦接近春分點回歸年嘅 365.24237日，即係大約每 8000 年誤差一日。相反，儒略曆嘅曆年係 365.25 日，約每 128 年就多咗一日，所以去到1582年嗰陣，儒略曆嘅春分日（3月21號）同地球公轉到春分點嘅實際時間已經相差咗 10 日。

正因為呢 10 日嘅誤差，國瑞曆開始行嗰陣，同時規定原先儒略曆1582年10月4號星期四，嘅第日係國瑞曆1582年10月15號星期五，即有 10 日唔見咗，不過原先星期幾嘅週期就唔改。國瑞曆嘅紀年沿用當時儒略曆已經採用嘅傳統，即係由計出嚟嘅耶穌出世嗰年開始，喺粵語區多數叫「公元」，喺臺灣多數叫「西元」，喺基督宗教又叫「主曆」（拉丁文：anno domini）。

世界各地嘅使用情況

國瑞曆係陽曆嘅一隻，中國官方響1912年開始用，取代傳統用開嘅中國曆法夏曆（黃曆），而中國傳統曆法係一隻陰陽曆，國瑞曆喺中文裏邊又叫陽曆、西曆、新曆。雖然渠好普及，但係而家都重有唔用公曆嘅國。唔少地方會用唔止一種曆法，非公曆嗰啲以用喺民間為主，尤其係喺宗教、節慶、玄學、農業等等嘅領域處。精密科技嘢就冚唪唥用公曆。

註

1. ｢額我略｣ 係拉丁文 Gregorius 嘅天主教譯音，｢國瑞｣ 係天主教短譯名，但係短譯名喺20世紀未或者21世紀初先開始有（實際日期無從稽考），即係1912年嗰陣唔會叫國瑞曆；其他譯名係跟英文（Gregorius 英文係 Gregory，形容詞式 Gregorian），但係譯之前首先將形容詞式還原返做名詞先譯。