李克用

李克用（856年—908年），沙陀族人，本姓朱邪（又作朱耶），佢阿爸受大唐天子賜李氏，係大唐末年最強大嘅藩鎮節度使之一，後嚟受唐封為晉王。佢係後唐莊宗李存勗阿爸，後唐創立之後，尊稱佢做太祖武皇帝。

生平

李克用阿爸朱邪赤心因為鎮壓龐勛兵變有功，受唐懿宗賜姓名為「李國昌」，所以克用都用「李」嚟做姓。李克用係李國昌第三仔，家族入面暱稱為「三郎」。因為天生一隻眼細啲，而畀人叫做「獨眼龍」；佢作戰驍勇，又因為佢衝鋒陷陣係諸將之冠，軍中又叫佢做「飛虎子」。佢重有個綽號叫「鴉兒」。

李克用15歲就從軍。乾符五年（878年），大同（家下山西省大同市）防禦使段文楚執法嚴厲，士卒怨恨。李克用畀下屬擁立，殺段文楚起事。廣明元年（880年）再殺河東（家下山西省太原市）節度使康傳圭，佔領太原，冇耐打輸畀唐軍，同阿爸着草去韃靼部落。

後來，朝廷赦免咗李氏父子嘅罪，要李克用帶沙陀軍南下助戰，鎮壓自稱大齊皇帝嘅黃巢。中和三年（883年），屢敗齊軍，黃巢退出長安，李克用被命為河東節度使，河東都做咗佢後來嘅根據地。中和四年（884年），李克用再南下大敗齊軍，最後逼到黃巢喺狼虎谷（喺家下山東省萊蕪市）自殺。

天祐四年（907年），朱溫篡唐稱帝，建立後梁，改元開平。李克用重用返大唐嘅「天祐」年號，以復興唐朝為名，同後梁展開爭鬥。第二年（908年），李克用死，仔李存勗繼位。後來，李存勗滅後梁、建後唐，李克用被追諡為武皇帝，廟號太祖。

攷

• 《舊五代史》卷二十五、二十六
• 《新五代史》卷四
• 《資治通鑑》卷二五三至二六六