曹昂

曹昂（170年代—197年），字子脩，沛國譙縣人。係曹操嘅大仔，庶妻劉氏所生，但係因為劉氏早死，所以由曹操嘅正室丁氏養大。曹昂聰明而且性情謙和，好得曹操鐘意，20歲時就舉孝廉。建安二年（197年）年跟住曹操出征張繡，俾張繡突然襲擊，曹昂為咗救曹操，負責斷後，同大將典韋一齊喺宛城戰死。

曹昂死咗之後，佢養母丁氏為咗呢件事同曹操離異，之後曹操就扶正卞夫人。曹操臨死前話「如果佢（曹昂）死咗有靈，子脩問我『我老母喺邊度』，我點用呢番話答佢？」魏文帝曹丕話過如果有曹昂同曹沖喺度，佢就唔做得皇帝。黃初二年（221年），追封謚號豐悼公，黃初五年（224年）又進一步追封做豐悼王。太和三年（229年）年改謚號叫愍王。