From Wikipedia, the free encyclopedia
新會(粵拼:san1 wui6;郵政式拼音:Sunwui)喺廣東中部,珠三角地區中西部。原本係個縣,叫新會縣,後來升格做縣級市,叫新會市。2002年9月成為江門市一個市轄區,叫新會區。
新會係廣東歷史文化名城,同開平、恩平、台山並稱四邑。之後加埋鶴山,並稱五邑,直到而家。區政府喺會城街道。總面積1,387.02平方公里,總人口104.51萬[咩時候?]。城市綜合實力列國家統計局2005年版中國百強城市第50位。名人薈萃係新會重要嘅人文特色,呢度係梁啟超、陳白沙、劉德華、陳垣等名人嘅鄉下,同時又作為嶺南學派嘅發源地,蘊含獨特嘅文化傳統,俾人叫做「海濱鄒魯之地」。
喺5000幾年前嘅新石器時代,新會重係珠江口上嘅一個海灣,之後西江泥沙長期淤積成陸。嗰陣時就有古越族人喺度漁獵、生活。近呢幾十年來,喺新會發現咗好多新石器時代嘅古人生活遺址,包括有都會貝丘遺址、梅閣炮台山沙丘遺址等,挖掘出一批有拍印紋飾嘅陶器碎片、粗陶器等文物。
公元前214年,秦始皇平定咗嶺南地區嘅百越之後,新會就隸屬南海郡番禺縣轄地[1]。秦末,趙佗創立南越,新會屬南越領地。元鼎六年,漢武帝滅南越國,新會為交州南海郡番禺縣轄地。吳黃武元年,孫權喺而家司前河村附近為治所置平夷縣,以討平夷族為名,意思係鎮撫喺當地佔大多數人口嘅土著居民,呢個係新會設立行政區嘅開始[2]。
晉滅吳之後,喺太康元年,改平夷縣為新夷縣[3]。喺新夷縣東面增置盆允縣[4],屬南海郡。又喺新夷縣西面增置封平縣[5]屬新寧郡[6]。由於新會嘅土壤啱葵樹生長,種葵同製作葵扇亦都逐漸發展起來。據《晉書·謝安傳》記載:「鄉人有罷中宿縣者,還詣安。安問其歸資,答曰:「有蒲葵扇五萬。」安乃取其中者捉之,京師士庶競市,價增數倍。」嗰陣新會尚未置郡,但所生產嘅蒲葵扇經陸路已由中宿(今清遠),輸往江左一帶銷售。
南北朝時期嘅劉宋永初元年,劉裕分南海、新寧兩郡之地置新會郡,領有盆允、封平、新夷三縣,以盆允為郡治[7],呢個就係新會得名之始,並一直沿用到今日。元嘉十三年,北燕昭成皇帝馮弘之子馮業率領三百人從高句麗浮海到此,被宋文帝封為懷化侯新會太守,成為咗馮姓入粵始祖,係有史可考最早嚟新會嘅移民活動。[8]嗰陣時新會郡境,北枕皂幕,南達南海,西起今陽東東平允泊,東至今中山坦洲,面積約8419平方公里[9],地域甚為遼闊。齊、梁、陳沿用新會郡。
隋開皇十年,隋文帝廢咗新會郡,將六個縣合併為新會縣[10]。以原來新會郡治盆允為新會縣治,係新會立縣嘅開始。又將新夷併入義寧;始康併入封平,置封州[11]。翌年改名允州[12]。十三年又改為岡州[13],州治喺而家會城。大業元年廢岡州,將封樂併入新會;封平併入義寧。至此,南朝宋時新會郡十二個轄縣省為兩縣,改屬廣州南海郡。
唐武德八年,由於新會盛產海鹽,官府開始喺而家台山沿海一帶設立咗岡州鹽場,到咗宋朝發展成六個鹽場。另外,喺古井官沖崖山附近嘅碗山窯址發掘嘅四千幾件陶器同青瓷器,證明唐代新會燒瓷業發達。官府採取嘅開放政策,鼓勵對外出口貿易,新會亦係外國商船出入嗰陣國際商埠廣州嘅必經之路,因此碗山官窯嘅瓷器亦都經由呢條海路源源不絕運出去外國銷售。當時新會嘅貿易已經好發達,市務稅錢4088貫,僅次於增城縣和扶胥鎮,成為咗嶺南第三商埠[14]。神龍元年,佛教僧人一行喺新會境內嘅五馬歸槽山種茶,觀天象,繪星圖,並在山上創建咗茶庵寺;又喺圭峰山上創建咗玉臺寺,令玉臺寺成為嶺南四大名剎之一。乾符七年,黃巢領導嘅起義軍攻陷咗廣州城並屠城,不久撤退至新會一帶,而家圭峰山有個山坑叫做黃巢坑。天祐二年,官府置辦岡州錫場。
五代十國時期,新會俾南漢所管轄。當時張九齡後裔張嚳率領族人從曲江遷嚟新會,喺新會分出榮、華、昌派。宋紹聖四年,蘇軾貶咗去儋州,曾途經新會。北宋末年,都會人黃道娘發明手工織布機,教授紡織技術[15]。宋高宗時,朝議大夫馬持國由臨安南渡入粵,喺金紫街定居,成為嶺南馬姓嘅始祖。咸淳九年,因蘇妃之亂,羅貴帶領35姓共97人從南雄珠璣巷南逃到新會,奠定咗今時今日新會姓氏宗族嘅分佈[16]。祥興元年,宋帝昺俾元軍追殺逃到新會,建立行宮。最後喺崖山海戰一役中俾元軍擊敗,丞相陸秀夫抱住趙昺投海殉國,南宋滅亡。
元滅宋之後,採取咗高壓政策嚟統治百姓,抗元復宋嘅起義不斷爆發,至元二十年,原南宋瓊州知州林獲次子林桂芳與宋宗室後裔趙良鈐兄弟,喺瀧水縣(瀧音雙,現今雙水)羅旁起義,抗元復宋。號稱羅平國,改元延康。冇耐之後俾元軍鎮壓,林桂芳等人全軍覆沒。
明洪武元年六月,朱元璋派征南將軍廖永忠,捕殺盤據新會多時嘅農民起義領袖黃斌,正式將新會納入咗明朝嘅版圖。廿四年,新會開始圍築縣城,從西面嘅西山一直到東面嘅馬山,周長660丈,縣衙建於城內。到咗萬曆年間,縣城修築到會城河邊,周長約莫5公里,新會城就成為咗廣東第三大城,僅次於廣州城同潮州城。嘉靖元年,佛朗機人別都盧同埋疏世利率領五艘船入侵新會,明軍派右都禦史總督兩廣軍務張嵿應戰,史稱西草灣之戰,呢場仗從西草灣[17]海面一直打到咗哨州[18]海面,最後明軍大獲全勝[19]。萬歷二十六年,西班牙駐菲律賓總督派兵喺虎跳門河岸設立據點,冇耐之後俾官府派兵驅趕。崇禎七年六月,荷蘭東印度公司海盜劉香,掠劫新會。兩廣總督熊文燦招撫唔到劉香歸降,就調派鄭芝龍軍隊將佢殲滅[20]。
崇禎十七年,明朝俾李自成滅咗之後,新會重係南明管轄範圍。到咗紹武元年十二月十五,清朝將領李成棟帶軍攻陷廣州,委派咗林鳳翺做知縣,新會納入咗清朝嘅領土。但係,永曆二年四月十五,李成棟轉投南明,新會一度重回南明管轄,但永曆四年十一月初二,清朝嘅尚可喜同耿繼茂重奪廣東,新會先至正式納入清朝嘅版圖[21]。
永曆八年,南明安西王李定國接連三次攻打新會城,圍攻咗新會城八個月,城中糧盡,守城清軍食城內居民充饑,到十二月初,食咗差唔多成萬人[22]。到最尾清軍援軍趕到,以火箭大破象陣,李定國逃走咗。康熙元年清廷為咗防止沿海居民接濟明朝遺臣鄭成功,下令遷海,沿海居民需向內陸遷徒五十里,加上實施海禁,新會受到嚴重影響。後來廣東巡撫王來任、廣東總督周有德請求復界,到咗康熙八年朝廷允許馳禁,居民陸續遷回。康熙五十七年,清政府設置崖門炮臺,嘉慶十四年遷至現址。第一次鴉片戰爭時,由於炮臺火力威猛,守衛森嚴,就連英軍不敢打埋嚟。咸豐四年,新會天地會首領陳松年、呂萃俊率領紅巾軍響應太平天國喺在江門起義,史稱狗山起義,不費一兵一卒占領江門。圍困新會城六十日咁耐,兩廣總督葉名琛派兵前嚟鎮壓,起義最終失敗。光緒三十年,根據《中英續議通商行船條約》第十六條規定,江門正式成為咗通商口岸。
1911年10月武昌起義成功後,黃明堂、黃梓等人在杜阮領兵起義,率領民軍進攻會城,喺11月10日和平光復新會。新會境內喺清末時,開始修築新寧鐵路;民國時又起咗新鶴公路、江佛公路交匯喺縣城東北10公里嘅江門鎮,新會縣城交通樞紐地位逐漸俾江門鎮取代,江門嘅快速發展,喺1925年11月26號脫離新會獨立成市,到咗1931年2月26號先回歸新會管轄。
中國抗日戰爭爆發以後,日軍喺1939年3月28號,派出咗南支派遣軍藤田旅團2800人從鶴山傑洲登陸入侵新會。國民革命軍進行咗頑強嘅抵抗,但因軍備落後,最終失守。4月2號,日軍太田部隊攻入會城,不久之後,新會全境大部分地區淪陷,縣政府流亡咗去雙水豪山張將軍家廟,1945年8月15日,日本宣布無條件投降。9月28號,日軍投降代表一三○師團參謀長吉村芳次等人喺台山公益胥山中學向六十四軍投降,新會正式光復。1945年11月至1949年秋嘅國共內戰期間,中共武裝組織曾至少五次對新會縣嘅國軍發動襲擊。1949年10月24號,中國人民解放軍第十五軍第四十五師和平佔領咗縣城會城,中華民國國軍撤退。自此,中國共產黨同佢創立嘅中華人民共和國政府開始咗喺新會縣嘅統治。
中華人民共和國成立之後,新會縣曾分別屬珠江專區、粵中行政區、佛山專區、江門專區、肇慶專區、佛山地區管轄。1951年江門重新設市,之後半個世紀新會不斷劃出土地畀江門市管轄,到咗2002年6月成為咗江門市嘅市轄區。1965年,新會縣劃出東南部地區同中山縣西南部地區一齊合設斗門縣。1992年10月8號經中國國務院批准,新會撤縣設市,成為咗省直轄縣級市,由廣東省政府委托江門市代管。另外,由於國家對新會高度重視,先後有周恩來、趙紫陽、董必武、賀龍、羅榮桓、郭沫若、朱德、葉劍英、華國鋒、傅作義、蔡廷鍇、李宗仁、鄧小平、艾倫·謝發德、習仲勛、任仲夷、李鵬、溫家寶、張德江等國家領導人同埋知名人士嚟到新會視察同訪問。
新會位於中國南部沿岸,珠江三角洲嘅中西部,西江、潭江嘅匯合處,北部、東北部接江門市,東部接中山市,東南部同斗門區接界,南面黐住黃茅海,西南接台山市,西接開平市,西北接鶴山市。海岸線長14.9千米。新會嘅地理座標為北緯22度5分43秒至22度48分24秒、東經112度47分13秒至113度15分24秒之間,東西闊46.6公里,南北長55.2公里[23]。
據地質學家考證,喺5000年前,新會重係珠江口嘅一個海灣,東南部一帶係成片島嶼。其後經過西江同潭江幾千年嚟嘅河流作用,新三角洲平原逐漸向海推進,特別係喺近九百年時間入面,新會東部先至逐漸形成家陣呢個遍佈河網嘅沖積平原。
新會而家嘅地貌主要係由山地、丘陵、台地、沖積平原同埋海灘等組成。北部係低山丘陵區,以雲峰山為主,雲峰山嘅主峰海拔545米。西南部係高山山脉區,以古兜山脉為主,古兜山脈嘅主峰獅子頭海拔982米,係新會嘅最高峰。東部係平原河網區,地勢順着西江嘅流向自西北向東南傾斜。河流面積佔咗新會全境嘅17%,包括有潭江,以及西江嘅三大出海口——磨刀門水道、虎跳門水道、崖門水道等,海岸線長14.9公里[24]。
新會位於華南地區,全境都係喺北回歸線以南,瀕臨南海,氣候炎熱,雨量充足,屬於海洋性嘅亞熱帶季風氣候,四季唔算分明。全年平均降水量為1784.6毫米,平均氣溫攝氏21.8度,平均相對濕度81%。每年四月中旬到十一月中旬,喺新會嘅夏天,天氣炎熱潮濕,朝早有時有驟雨同雷暴。晏晝最熱,平均氣溫超過攝氏31度,晚間會跌返落去攝氏26度咁上下。十一月中旬至下年四月中旬就係冬天,平時天陰,間中會有冷鋒經過,吹乾燥北風。氣溫有時會跌到攝氏10度以下,古兜山等高地,氣溫仲會降到去攝氏0度左右,會有結霜嘅情況出現。
2007年,新會耕地有成28533公頃,人均0.038公頃,可利用嘅土質類型包括有水稻土、紅壤、菜園土[25]。境內主要礦種有錫、鎢同埋石英等。森林覆蓋率方面,2008年嘅數據係30.6%[26],高於全國嘅水平。新會境內生物資源豐富,主要集中喺古兜山區,境內珍稀植物有銀杏、水松、水杉等。
新會目前擁有國家級森林公園、省級自然保護區各一處。
名 | 級別 | 名 | 級別 |
---|---|---|---|
圭峰山森林公園 | 國家級 | 古兜山自然保護區 | 省級 |
根據新會區統計局嘅統計數據,截至2007年年尾,新會總人口估計有成 104.51萬人,其中戶籍人口有 74.51萬人,外來人口約有30萬人。人口分佈方面,會城街道人口數佔戶籍人口嘅36%,雙水鎮則佔12.5%,其餘48.5%嘅人口則分佈各鄉鎮。人口密度為 753人/平方公里,人口密度最高係會城,每平方公里有1891人。而崖門鎮嘅人口密度最低,每平方公里得 142人。
新會人口喺呢60年以來一直都保持上升嘅趨勢,戶籍人口從1949年嘅62.5萬人增加到2007年嘅 74.51萬人。另外,祖籍新會嘅海外華僑同埋移居香港、澳門、台灣三地嘅移民共有 110多萬人,分佈喺三十七個國家同地區,新會亦因為咁俾人叫做「僑鄉」。新會嘅居民主要以漢族為主,佔戶籍人口嘅99.99%。少數民族有13986人,依次為壯族、瑤族、土家族等。新會嘅漢族人當中,大多數係廣府人,此外重有少量客家人同埋蜑家人。
年份 | 420 | 1391 | 1492 | 1512 | 1609 | 1686 | 1771 | 1839 | 1907 | 1939 | 1941 | 1949 | 1953 | 1964 | 1982 | 1996 | 2007 |
---|---|---|---|---|---|---|---|---|---|---|---|---|---|---|---|---|---|
人口數目(萬) | 1.05 | 8.12 | 7.26 | 6.02 | 7.21 | 7.01 | 14.46 | 68.84 | 130 | 88.16 | 43.09 | 62.58 | 55.06 | 67.70 | 80.38 | 85.25 | 74.51 |
新會嘅語言以粵語四邑片新會話為主,壯語、客家話、閩語喺新會都有分佈。新會嘅粵語主要分為會城話、雙水話、古井話三種。客家話主要分佈喺大澤嘅同和、鯽魚山等村。閩語方言主要分佈喺睦洲鎮、大鰲鎮嘅沙田地區,分為睦洲話、大鰲話等。壯語方言主要分佈喺西面嘅司前河村一帶,以司前話為代表。
新會戶籍人口最多嘅頭十個姓氏依次係梁、黃、李、陳、林、趙、張、吳、譚、鍾。
新會嘅行政區劃係市轄區、鎮(街道)兩級建制,區下面直接管轄1個街道同10個鎮,區政府駐地喺會城街道。
新會喺1960年代之前仍然以手工業為主,產品以葵扇著稱。清光緒年間,葵扇、夏布、煙絲、蠶絲、茶葉已經成為出口商品,行銷香港及國內等地。辛亥革命後,新會起咗江鶴、江會、江海、江北、江禮、江佛、新開七條公路,加強對外聯繫,促進咗經濟發展。到咗1936年,新會葵扇年產生葵1.3億柄,葵製品遠銷蘇聯、美國、英國、法國、古巴、哥倫比亞、秘魯、智利等20多國家和地區。柑、桔、橙水果總產量為77900噸,占咗廣東省產量嘅47.2%,遠銷香港、南洋同埋國內各大城市。對外貿易興盛。1949年後,相繼創立咗新會糖餅廠、新會水泥廠、新會鋼鐵廠、新會造船廠等等嘅國營企業。喺中國推行經濟改革政策以後,新會吸引咗香港、澳門、台灣同埋國外嘅大量資本進入,五金、食品、造紙、集裝箱、紡織、鋼材、電器、摩托車等工業有咗快速嘅發展。據新會區統計局嘅數據,2007年新會嘅國內生產總值為263.16億元人民幣,比上年增長16.06%,全區按戶籍人口統計人均生產總值達到35319元人民幣,折合4829美元,比上年增長22.59%。城鎮登記失業率為2.39%[27]。
新會過去係廣東嘅農業大縣,被譽為廣東嘅「魚米之鄉」,重係桑基魚田種植最發達嘅地區之一。但近年工業和第三產業嘅發展,令到農業喺經濟總量嘅比重逐年下降,2007年新會農業嘅增加值得20.92億元人民幣,僅佔全區國內生產總值嘅7.95%。新會嘅農業主要以糧食、蔬菜、水果嘅種植業,淡水漁業和豬、家禽嘅養殖業為主,此外,新會柑、新會陳皮喺海外地區也相當出名,成為咗國家地理標誌保護產品。
新會工業開始發展嗰陣,以國有企業為主,其後隨着中國改革開放嘅深入,外來投資比重日漸增加。近年來着重於以工業同科技為主體嘅經濟發展戰略,工業占全區經濟總量嘅比重越來越高,2007年新會工業嘅增加值有143.12億元人民幣,占咗全區國內生產總值嘅54.38%。形成咗五金不鏽鋼、食品、造紙、集裝箱、化纖紡織、鋼材、電器、摩托車、軌道交通九大支柱產業。
經中國國務院各部委審批,新會目前建立咗中國不鏽鋼製品生產基地、國家火炬計劃江門紡織化纖產業基地、廣東銀洲湖紙業基地同埋廣東江門市銀洲湖石化基地。
另一方面,新會區亦都注重特色工業重鎮嘅發展,會城嘅食品業和造紙業、雙水鎮嘅造紙業和拆船業、司前鎮嘅不銹鋼業、大鰲鎮嘅集裝箱業、羅坑鎮嘅化纖紡織業同埋睦洲嘅小家電業等區域特色經濟發展迅速,成為咗當地重要支柱產業。
近年來,陸續有不少嘅世界500強企業前來投資。新會本身亦都孕育咗唔少中國名牌或者中國馳名商標,例如維達衛生紙、李錦記醬油、美達錦綸等。
新會第三產業嘅規模僅次於工業,2007年第三產業嘅增加值為99.12億元人民幣,占咗全區國內生產總值嘅 37.67%,並且呈逐年增長嘅趨勢。物流業、房地產業、旅遊業、係新會嘅三大第三產業
喺物流業方面,一批大型物流項目如大昌慎昌、名冠陸續投入運營。喺房地產業方面,近年來新會良好嘅人居環境激發咗房地產市場嘅巨大發展潛力,吸引咗碧桂園、和記黃埔等知名房地產商相繼進駐新會。喺旅遊業方面,新會注重將文化與旅遊相結合,塑造出小鳥天堂、梁啟超故居紀念館同埋崖門宋元古戰場等一批富文化、歷史內涵和新會特色嘅人文景點,促進咗新會旅遊業嘅發展。新會總共有6間星級酒店,2006年,新會全年接待遊客高達 365萬人次。
新會擁有中度發展嘅交通網絡。以公路為主、水運為輔,並充分利用咗珠三角區域其它城市嘅港口、機場、鐵路等資源。公共運輸嘅主要組成部份包括巴士(公共汽車)、小巴(公共小型巴士)、的士同埋渡輪等。其中,巴士係新會最主要嘅公共運輸工具。
根據2007年新會區統計局嘅數據,新會共有公路通車里程1225公里,公路密度為每百平方公里88.3公里。新會嘅道路網絡,大致上可以分為公路、橋樑同埋渡口。2007年,新會通車嘅高速公路有江中高速公路、江珠高速公路、佛開高速公路、西部沿海高速公路同埋新台高速公路,佢哋同325國道、京珠高速公路一起為骨架,構成了四通八達嘅公路網,加強咗新會與周邊廣州、珠海、佛山、中山等城市嘅聯繫,使區內交通與珠三角區域性交通形成緊密嘅銜接。
新會喺西江、潭江下游交會處,南瀕南海,境內河道縱橫,通江達海。早喺宋末嗰時,皇室沿水路逃亡到呢度,到咗元代就有定期嘅客、貨船來往廣州,到咗清康熙年間,開往廣州、佛山、香山各地嘅航線逐漸增加。後來由於會城河日漸淤塞變窄,到咗清末新會水路交通中心逐漸俾江門鎮取代咗。改革開放之後,政府喺天馬銀洲湖畔設立新會港,2001年10月,新會港天馬港區成為咗國家一類貨運口岸,銀洲湖俾國家確定為對外開放水域,面積成65平方公里。新會港最大靠泊能力5000噸級,通過能力為10萬個標準箱,集裝箱嘅年吞吐量為86萬噸。
新會喺清朝宣統年間已有鐵路嘅出現,陳宜禧修建新會北街到新寧寧城嘅新寧鐵路,新會段全長約40公里,連接牛灣同北街,於1910年開工,1913年3月全線起好。大王市到牛灣一段更使用渡輪渡過潭江,成為咗中國第一條使用火車輪渡嘅鐵路。1927年5月16日,北街至會城一段使用輕鐵列車行駛,成為咗中國第一條輕便鐵路,七七事變後,為咗防止日軍利用,喺1939年2月14號奉命停運,最後俾國民政府拆毀。
目前營運緊嘅有廣珠城軌廣州南-小欖-新會支綫,境內設有終點站新會站,2011年通車。而廣珠鐵路由北至南連接會城、三江、古井同沙堆等鎮,設有新會南站同古井站,預計2011年建成通車。根據江門市城鄉規劃局公佈嘅《江門市綜合交通一體化規劃(一期)》同埋新會國土資源局公布嘅《新會區土地利用總體規劃圖》,廣東西部沿海高速鐵路由東向西經過會城、雙水進入台山境內,新會設有新會南站同雙水站。江恩城際軌道由新會站向西伸延,經過南坦、小岡、羅坑、司前等鄉鎮進入開平,新會設有會城站、司前站。廣佛江珠城際軌道由新會站向南伸延,途經新會三江、古井、沙堆進入珠海境內。斗珠城際軌道經過新會南部,喺崖門設有蓮花石站;喺沙堆設有南門站。2020年7月2日,深江鐵路开工建設。11月15日,廣珠城軌延伸至珠西樞紐江門站與江湛鐵路貫通營運。
1949年7月,政府喺江門鎮北街西江河面開闢咗江門至廣州、江門至香港嘅水上飛機航線,三個月後因解放軍南下而停航。現時,新會150公里半徑範圍內有廣州、深圳、珠海、香港、澳門等5個國際機場,可以俾新會市民使用。
新會最早記載嘅學校係喺會城嘅學宮,係官府喺北宋初年開設嘅縣學,到咗慶曆四年遷至學宮,係歷代生員課讀嘅地方。南宋嗰時,新昌鄉民鄧榮喺會城北郊黃雲山下,創辦咗新會第一間私立書院;到元咗朝至正年間,知縣沈壽喺金紫街上,創立咗第一間官辦嘅古岡書院,歷經數百年,頗負盛名。到咗雍正十年改為義學。到明朝中葉,新會籍教育家陳獻章提倡興學育人,令到全縣各鄉,都有成立社學。到咗清末,梁啟超主張「廢科舉、興學堂」。光緒三十年,會城開設咗私立嘅求志學堂,同埋幽馨女子學堂,為新會學堂創設之始。第二年,新會一中嘅前身新會官立中學堂成立,為新會中學教育之始。到咗光緒三十四年,全縣共有中小學堂五十六間,學生達1500人。
目前,隨着人口急劇老化,生育率不斷下降,令到大部分學校收生不足,有啲學校甚至乎出現咗「一對一」教學嘅現象,造成多數鄉村學校被「殺校」。學校經過大量撤併,至2007年,新會共有普通中學58所,職業中學6所,小學88所。全區普通中學在校學生5.56萬人,職業中學在校學生5900人,小學在校學生7.18萬人。小學適齡兒童入學率100%,初中升學率98.01%。
新會著名嘅特產品有葵扇、陳皮、甜水蘿蔔、甜橙、黃沙蜆、禾蟲、粉葛、同埋荔枝等,其中以陳皮最為出名,為廣東三寶之首,陳皮係用新會出產嘅大紅柑剝皮後曬乾而成,早喺東漢時期已經有記載,到宋代成為咗「廣貨」之一,遠銷全國各地及外國,到清同治年間,陳皮俾慈禧太后指定為貢品,因此有「千年人蔘,百年陳皮」嘅美譽。醫學研究指出,貯存越耐嘅陳皮含有越多嘅黃酮類,而黃酮類有抗氧化同埋增加免疫能力嘅功效,因此年份越耐嘅陳皮價值就越貴。陳皮嘅種類分為青皮同紅皮,各有不同嘅效用。中秋節至農曆九月初所採摘嘅柑皮為青皮,產量少但藥用價值高。農曆九月後至冬至所採摘嘅柑皮為紅皮,可以食用及藥用。新會柑剝皮之後,立即運到大空地上曬兩至三天,曬完之後裝入密嘅玻璃樽入面等下一年清明節前後再曬兩到三日,三年之後柑皮曬成陳皮,再由啲女工負責進行嚴格嘅篩選分級,一毫米厚嘅為一級大紅皮;顏色比較淡,厚度薄少少嘅係二級皮;至於體型最细嘅為青皮。陳皮分級後用麻袋裝着放入倉庫,令陳皮更容易起到防潮作用同埋陳化作用。
另一種出名嘅特產葵扇亦相當著名。早喺晉朝史書已有記載,到明末清初進入咗黃金時代,遠銷至全國各地,朝廷將其列為貢品[28],當時喺上海、重慶、漢口、蘇州等地都有葵扇出江幫設立嘅岡州會館,作為葵扇交易同葵商居住嘅場所。清道光年間,新會城嘅葵業商號激增到一千多戶。1915年,竹籜畫織扇獲得咗巴拿馬博覽會金牌獎。1980年代後,電風扇取代咗葵扇,紡織業取代咗葵業嘅位置,葵扇業日漸式微。
新會嘅廣播事業可以追溯到1951年,新會電台嘅前身新會新聞收音站開播,而家新會電台以FM98.3嘅頻率廣播。而新會唯一一間有線電視台新會電視台就係喺1984年1月啟播,而家都仲有營運。而第一份報紙係1912年創辦嘅《岡州星期報》,第一份日報係《新會醒報》,不過而家新會冇自己嘅報紙發行。
新會傳統嘅本地菜式以粵菜為主。特色菜式有:古井燒鵝、雙水燒雞、司前嘅溫蛋、狗肉、夜魚、睦洲嘅黃沙蜆,仲有以陳皮為特色嘅陳皮骨等。其中以古井燒鵝最出名,古井燒鵝皮脆甘香,肉質鮮甜嫩滑,唔單止深受本地人嘅歡迎,重有啲外地人特登揸車嚟買,就連香港特首曾蔭權亦都親自嚟買燒鵝帶返屋企食。
新會人嘅飲食習慣和廣東其他地方一樣係一日三餐。早餐嘅時間喺早上6點到10點,啲人習慣去茶樓嘆番一盅兩件,或者去街邊舖頭仔食腸粉、粥、撈麵、雲吞麵。中午飯同晚飯,好多人都喺屋企食。但有啲人會到快餐店食飯,又或者喺屋企打電話叫快餐店外賣。另外,由於外來人口增多,新會嘅街頭小食例如雞蛋仔、狗不理、麻辣串同埋醬板鴨等亦受到好多人嘅歡迎。
新會旅遊資源豐富,名勝古蹟眾多,係知名嘅旅遊城市。
新會八景
新會八景係指喺新會最著名八個嘅旅遊景點。自宋朝以嚟,均由當地人評選八景,佢哋係:古岡獨松、象山秋月、黃雲樵笛、紫水漁舟、江門晚渡、熊子歸帆(註:熊字實際係「上能下三點」,唔係下四點,讀音係「尼」。因爲電腦冇字,寫下四點嘅熊做代替)、崖門春浪、圭峰瀑布[29]。經歷咗幾百年之後,剩番象山秋月、熊子歸帆、崖門春浪三景,其餘五景都已不復舊觀了。呢八景作成粵詩,叫做[29]:
「 | 圭峰瀑布影,象山秋月明。 崖門好浪景,沙堤紫水清。 古岡獨松真茂盛, 熊子歸帆風駛正。 黃雲樵笛幾高興, 江門晚渡好客情。 |
」 |
以下係1988年11月9日嘅新會八景(新版八景)。
新會八景 | |
---|---|
圭峰疊翠 | 小鳥天堂 |
叱石松濤 | 公坑禾雀 |
象山秋月 | 葵湖春曉 |
銀洲塔影 | 崖門覽勝 |
新會係廣東歷史文化名城之一,擁有全國重點文物保護單位1處,獨有國家級非物質文化遺產3項,國家4A級旅遊景區2處,古蹟最古老嘅係隋朝時起嘅龍興寺石塔。
新會嘅國家4A級旅遊景區 | |
---|---|
圭峰風景區 | 古兜溫泉旅遊度假村 |
新會嘅全國重點文物保護單位 | |
梁啟超故居 | |
新會嘅省級重點文物保護單位 | |
龍興寺石塔 | 鎮山寶塔 |
崖門炮台 | 新會學宮 |
張將軍家廟 | |
新會嘅縣、市、區級文物保護單位 | |
仙涌寺地藏院碑 | 奇石 |
楊太后陵 | 慈元廟碑刻 |
慈元廟舊址 | 凌雲塔 |
白玉塔 | 周恩來總理視察新會紀念室 |
新鶴人民抗日游擊隊大隊部舊址 | 新會革命烈士紀念碑 |
宏文社學 | 古窯群遺址 |
煉丹井 | 蓮花井 |
石戲台 | 石井及慈尊宫 |
文炳閣 | 「百歲流芳」石牌坊 |
宋宗室親臣趙公祠 | 見龍橋 |
華僑義冢墓群 | 景堂圖書館舊址 |
新會書院 | 抗戰紀念塔 |
羅山咀貝丘遺址 | 下沙沙丘遺址 |
慧龍寺遺址 | 古城遺址 |
黃道娘墓 | 林玄輔墓 |
建安郡王祠 | |
新會嘅國家級非物質文化遺產 | |
蔡李佛拳 | 新會葵藝 |
白沙茅龍筆製作技藝 | |
目前,新會有佛教、道教、天主教、基督教四大宗教,開放嘅宗教活動場所有八處,教徒約有六百幾人。
新會嘅宗教團體 | |
---|---|
新會區佛教協會 | 新會區基督教三自會 |
新會區基督教協會 | 新會區天主教聖瑪竇堂 |
據清康熙《新甯縣誌》記載:佛教喺南朝梁天監元年,天竺僧人智藥三藏坐船嚟中國,遇到颱風,喺烏洞(今台山廣海)一帶上岸,種下咗中國第一棵菩提樹,嗰度後來起咗間靈湖寺。呢個係佛教最早到達新會郡地嘅文字記載。到咗唐代神龍年間,僧人一行嚟到新會圭峰山喺山腰起咗間玉臺寺,從此香火鼎盛,後來重成為嶺南四大古剎之一。
新會道教以正一派為主,據記載,喺唐宋時期開始已經有人修道煉仙,到咗元朝,新會道教頗為興盛,明清時代道教開始衰落,而家最出名嘅道教宮觀係紫雲觀。
天主教喺清康熙三十三年由那伏鄉人高竹傳入新會,並喺金紫街建教堂。教堂喺雍正禁教時俾官府收番,改做公所,其後改為古岡義學,之後百幾年新會都冇傳教活動,但仍有世襲嘅天主教徒。鴉片戰爭後,清廷允許洋人來華傳教,世襲天主教徒將鳳池里一座房屋賣俾教會用嚟起天主教堂,1954年搬到而家嘅地方。
基督教喺清同治十年由美國長老會駐廣州牧師那夏禮傳入,喺會城東關路設立教堂。此後,英國衛斯理宗、英國聖公會、德國信義宗、美國公理宗、美國浸信會同埋安息日會等眾多嘅差會陸續進入新會,分別喺會城、江門同古井等地相繼設立教堂。到咗光緒三十四年,新會共有教堂21間,其中基督教堂十八間,天主教堂三間。文化大革命結束後,教堂重新開放。1984年新會成立基督教三自愛國教會,恢復基督教活動,而家得番基督教堂3間,天主教堂1間。
由於新會係一個水鄉,所以新會各地幾乎都有天后廟。其他供奉嘅神明主要有觀世音菩薩、龍母、康王、關帝、北帝(玄天上帝)同埋司天氣嘅南海神洪聖等。
新會區係一個人文歷史底蘊深厚嘅城市,自有史以來湧現一大批名人,以下列舉新會全部名人。
章枚,原名蘇壽彭。中國作曲家、教育家。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.