擴展元素周期表
From Wikipedia, the free encyclopedia
目前嘅元素週期表裏面有七個週期,並以118號元素Og終結。如果有更高原子序數嘅元素被發現,佢就會被列入第八週期,甚至第九週期。呢個額外嘅週期預計會比第七週期容納更多元素,因為經過計算,新嘅g區將會出現。g區將容納18個元素,各個週期都有部分填滿嘅g原子軌域。呢種擁有八個週期嘅元素表最初由格倫•西奧多•西柏格喺1969年提出[1]。
第八或以上週期嘅元素未曾被合成或者喺自然發現(2008年4月,有人宣稱發現122號元素Ubb存在喺自然界中,但被廣泛認為係錯嘅[2]。)。g區裏面第一個元素嘅原子序數應該係121。根據IUPAC元素系統命名法命名為unbiunium,符號Ubu。呢個區域裏面嘅元素好可能極之唔穩定,並具有放射性,兼半衰期極短。然而穩定島理論預測126號元素Ubh會喺穩定島內,唔會有核裂變,但會有α衰變。而穩定島以外重可以存在幾多物理上可能嘅元素,到而家都未有結論。
根據量子力學對於原子結構解釋嘅軌域近似法,g區會對應未完全填滿嘅g軌域。不過,自旋-軌道作用會削弱軌域近似法所得結果嘅正確性,咁可能會發生喺較大原子序嘅元素上[3]。