奇幻
From Wikipedia, the free encyclopedia
奇幻(粵拼:kei4 waan6;英文:fantasy / phantasy [1],可以借入粵語做粵拼:fen1 te4 si4),又或者叫魔幻,係推想型故仔[歐 1]下嘅一個體裁,泛指個故仔設於虛構宇宙嘅作品。廿世紀嘅出名奇幻作品有《魔戒》、《哈利波特》同《冰與火之歌》呀噉[2][3]。
- 奇幻故仔因為設喺虛構嘅世界,所以往往會有一啲現實世界冇嘅超自然力量或者同現實世界唔同嘅物理法則,例如係魔法噉。
- 喺角色上,奇幻故仔多數會涉及一啲神話傳說當中嘅生物,包括高扁、精靈、以及西洋龍等,甚至乎係作者自己想像出嚟嘅生物。
- 奇幻同科幻以及好多恐怖故仔一樣,故仔內容通常涉及現實世界唔存在嘅事物,所以屬於推想型故仔,三者嘅分別在於科幻重視對科學科技嘅想像(故仔有一啲現實世界冇嘅先進科技)、恐怖故仔主題環繞死亡等人類本能上恐懼嘅嘢(故仔有鬼魂同喪屍等嘅超自然元素),而奇幻冇或者唔著重呢啲嘢;不過一個故仔係有可能同時屬多過一個體裁嘅。
同第啲文學體裁相比,奇幻故仔另一個特色係零舍睇重世界創建:喺作一個奇幻故仔嗰陣,作者需要好俾心機建構佢心目中嘅魔幻世界,例如《魔戒》作者就認真到為自己諗出嚟嗰個魔幻世界整咗地圖,描述佢個世界係點嘅(而且佢並唔係唯一一個噉做嘅奇幻作家),仲要