大帽山
香港最高山峰 From Wikipedia, the free encyclopedia
大帽山（粵拼：daai6 mou6 saan1，英文：Tai Mo Shan），又名大霧山，《香港雜記》繙做大磨山，係香港一山。海拔九百五十七米，係香港至高，高過第二嘅鳳凰山廿三米。大帽山處於新界中部，山體廣闊，坡度平緩，附近範圍劃入大帽山郊野公園之內。山系一帶，伸入大欖郊野公園同埋林村郊野公園。大帽山位於荃灣區同埋元朗區交界，小部分歸大埔區。
,_and_Tai_Mo_Shan_peak_in_distance.JPG)
由於大帽山喺春天不時都有大霧，絕大部份香港人都叫佢做「大霧山」。
大帽山主要由火山岩組成，喺山谷亦有唔少沉積岩。山坡嘅上半部露出山脊，亦有一啲石澗由高地流到山谷。大帽山由於係全港至高，可以遠望四處。佢南面近處係荃灣，遠啲係青衣島，再遠可以望到香港內洋。而東望則可見馬鞍山，北望近見石崗。天氣好時，向西南遠望，會見到大嶼山。
香港政府將佢劃入郊野公園，是爲大帽山郊野公園。呢帶山林最大威脅係山火。一九六八年，火燒大帽山同城門，燒咗卅四粒鐘，毁咗廿八萬幾樖樹。
《香港雜記》有云，大清「守兵多寨於此。」而大帽山高地，方便傳送煙號，以防海賊。《新安縣志》亦提過，大帽山「上有石塔，多產茶」，路經麥理浩徑第八段嘅時候，就會見到以前嘅梯田。
大帽山平均溫度，全港至低[1]，只有攝氏十七度二，比天文臺廿三度一，低六度左右。全年有一百零三日，處於寒冷天氣狀態，全港之冠。而全年平均濕度係百分之八十八。
大帽山東南面有森林，但受氣候限制，喬木只可以伸展至海拔550米，再高啲嘅地方植物主要係灌木同埋草。以前大帽山曾經盛產綠茶，名霧茶或雲茶。現時山坡有見梯田痕跡。
大帽山有車路，名大帽山路，由荃錦公路杈出。大帽山路頭，有扶輪公園，有遊客中心，設有好多停車位。
由於好多人將「帽」字陰上變調嘅音mou6*2當成係個字本來嘅讀音，所以「大帽山」呢個名，喺口耳相傳嘅時候，經常俾人誤會成「大霧山」，因為「霧」字都係讀 粵拼：mou6，同「帽」、「冒」同音。而且大帽山山頂好高，時時有霧，加深咗呢個誤會。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
