From Wikipedia, the free encyclopedia
大野狼(粵拼:daai6 je5 long4;英文:Big Bad Wolf),或者叫大壞狼,係喺多個童話故事同寓言-包括小紅帽、三隻豬仔、同狼嚟喇等-當中都有出現嘅一種模式化人物,特徵係佢係一隻灰狼,負責喺個故仔入面扮演大奸角,通常會嘗試將主角食落肚。
遠古時期好多歐洲以至近東嘅文學作品都有狼嘅形象出現,而且多數都唔將狼視為好嘢。伊索有喺佢嘅幾個寓言當中將狼描繪成破壞同危險嘅象徵,觸及當時以牧羊為生計-所以唔多鍾意狼-嘅古希臘人嘅神經,例如佢個出名作品《狼嚟喇》就用咗狼嚟做大奸角,亦都令到「嗌狼」(to cry wolf)到咗廿一世紀喺西人之間成為「講大話」嘅比喻詞,而且伊索嘅另外幾個作品都有以「牧羊人同狗一齊合作對抗狼」做主題[1]。
聖經提咗狼 13 次,多數都係攞狼嚟做貪婪同破壞嘅代表,例如喺新約當中,耶穌本人將佢嘅追隨者比喻成羊,迫害佢追隨者嘅人比喻成狼[2]。
喺中世紀以至摩登時代嘅歐洲文學當中,狼依然以扮演人類嘅敵人為主。出名嘅童話故事《小紅帽》將狼描繪成能夠模仿人類講嘢,甚至乎係類似強姦犯噉嘅形象(被描繪成會跟蹤同傷害細路女),而有學者指出,小紅帽係狼嘅形象喺近代西方文化當中惡劣嘅主因之一[3];類似嘅狼角色亦都有喺《三隻豬仔》同《狼同七隻小山羊》等嘅故仔當中出現[4];東歐嘅俄羅斯文學裏面好興描述狼攻擊人類同牲畜,而喺呢啲故仔入面,人類往往跟住就會同狗一齊去獵殺狼[5]。
要等到近廿世紀起嘅歐美文學當中,狼嘅形象先開始有所改善。喺 1894 年出版、到咗廿一世紀都仲相當受歡迎嘅英國故事集《叢林奇譚》當中,狼唔係被描繪成鍾意食肉嘅奸角,而係以家族形式生存、座右銘為「狼嘅力量在於狼群,狼群嘅力量在於狼」嘅高貴動物(呢點同同期嘅文學作品差天共地)。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.