普通話拼音

 普通話拼音（粵拼：pou2 tung1 waa2 ping3 jam1） ，係用拉丁字母記寫漢字普通話音嘅轉寫體系。係由中華人民共和國政府喺1958年所創，1979年取代咗威式拼音成為英文拼寫中國大陸人名、地名嘅標準拼音。

中華人民共和國官方叫佢做漢語拼音hon3 jyu5 ping3 jam1（普通話拼音：Hànyǔ pīnyīn），但漢語唔等於普通話，呢個嗌法明顯有問題，有官話霸權主義（見推普滅方）之嫌。

字母表同英文字母表一樣。喺拼寫上，呢套拼音根據普通話嘅語音分成咗聲母表同韻母表，聲母有21個^[1]，韻母有37個，另外重有4個聲調符號同1個隔音符號。

聲母

包括每個音節開頭嘅輔音，但係唔包括零聲母嘅情況。上面嗰個係拼音字母，下面係國際音標。

	塞音		鼻音	邊音	塞擦音		擦音
	清音		濁音	濁音	清音		清音	濁音
	不送氣	送氣			不送氣	送氣
雙唇音	b /p/	p /pʰ/	m /m/
唇齒音							f /f/
齒齦音	d /t/	t /tʰ/	n /n/	l /l/	z /ts/[2]	c /tsʰ/[2]	s /s/[2]
捲脷音					zh /ʈʂ/	ch /ʈʂʰ/	sh /ʂ/	r /ʐ/[3][4][5][6]
齦顎音					j /tɕ/	q /tɕʰ/	x /ɕ/
軟顎音	g /k/	k /kʰ/					h /x/

聲母表個順序：

b p m f

d t n l

g k h

j q x

zh ch sh r

z c s

.

拼音字母 b p m f d t n l 注音字母 ㄅ 玻 ㄆ 坡 ㄇ 摸 ㄈ 佛 ㄉ 得 ㄊ 特 ㄋ 訥 ㄌ 勒

拼音字母 g k h 　 j q x 注音字母 ㄍ 哥 ㄎ 科 ㄏ 喝 　 ㄐ 基 ㄑ 欺 ㄒ 希

拼音字母 zh ch sh r z c s 注音字母 ㄓ 知 ㄔ 蚩 ㄕ 詩 ㄖ 日 ㄗ 資 ㄘ 雌 ㄙ 思

韻母

下列普通話拼音37個韻母，每一格嘅第一行第一個係唔拼聲母嘅寫法；第二個係拼聲母嘅寫法；第三個係IPA；第二行第一個係注音字母，第二個係例字。注意帶-r係標示呢個韻母兒化咗，唔係話個-r會發音^[7]：

	開口呼	齊齒呼	合口呼	撮口呼
單 元 音 韻 母	-i [ɿ]/[ʅ] 「字」「指」嘅韻母[8]	yi -i [i] 丨　衣	wu -u [u] ㄨ　烏	yu -ü/-u [y][9] ㄩ　迂
	a -a [a][10] ㄚ　啊	ya -ia [i̯a][10] 丨ㄚ　呀	wa -ua [u̯a][10] ㄨㄚ　蛙
	o -o [o̞][11] ㄛ　喔		wo -uo [u̯o] ㄨㄛ　窝
	e -e [ɤ][12] ㄜ　鵝
	ê [e̞][13] ㄝ　誒	ye -ie [i̯e̞] 丨ㄝ　耶		yue -üe/-ue [y̯e̞][9] ㄩㄝ　約
	er [ɚ][7][14] ㄦ　兒
複 元 音 韻 母	ai -ai [aɪ̯] ㄞ　哀		wai -uai [u̯aɪ̯] ㄨㄞ　歪
	ei -ei [eɪ̯] ㄟ　誒		wei -ui[15] [u̯eɪ̯] ㄨㄟ　威
	ao -ao [ɑʊ̯][16] ㄠ　熬	yao -iao [i̯ɑʊ̯] 丨ㄠ　腰
	ou -ou [oʊ̯] ㄡ　歐	you -iu[17] [i̯oʊ̯] 丨ㄡ　優
帶 鼻 音 韻 母	an -an [an] ㄢ　安	yan -ian [i̯ɛn] 丨ㄢ　煙	wan -uan [u̯an] ㄨㄢ　彎	yuan -üan/-uan [y̯ɛn][9][18] ㄩㄢ　冤
	en -en [ən] ㄣ　恩	yin -in [in] 丨ㄣ　因	wen -un[19] [u̯ən] ㄨㄣ　温	yun -ün/-un [yn][9][20] ㄩㄣ　晕
	ang -ang [ɑŋ] ㄤ　昂	yang -iang [i̯ɑŋ] 丨ㄤ　央	wang -uang [u̯ɑŋ] ㄨㄤ　汪
	eng -eng [ɤŋ] ㄥ　「亨」嘅韻母	ying -ing [iŋ] 丨ㄥ　英	weng[21] [u̯ɤŋ] ㄨㄥ　翁
	-ong[21][22][23] [uŋ] ㄨㄥ　「轟」嘅韻母	yong -iong[22][24] [yŋ] ㄩㄥ　雍

聲調

普通話四聲調值曲線法表示

普通話入面有四個聲調同埋輕聲：^[25]

• 第一聲（陰平，或平調，¯）
• 第二聲（陽平，或升調，ˊ）
• 第三聲（上聲，或上音，ˇ）
• 第四聲（去聲，或去音，ˋ）

爭議

雖然官方稱之為「漢語拼音」，但實際上漢語萬萬千，各地語音唔同，呢套拼音只能夠拼寫到普通話嘅語音，論拼寫廣府話就要另造拼法，而佢拼寫體系中以清濁字母分別對應送氣、冇送氣聲母嘅做法，面對江浙話、福建話呢啲塞音三分（清濁+清音送氣不送氣）嘅語言就更加拼寫唔到。而呢啲南方漢語都係「漢語」，所以有人認為呢個名名不副實，甚至宣揚緊「官話霸權」，暗示只有官話先至係漢語、其他漢語語都唔算「漢語」，而呢點係嚴重違反事實嘅。

而家普通話拼音係中國大陸漢族地方統一嘅地名、人名英文寫法，唔似港澳、外國唐人個名可以據佢自身母語發音來拼寫，畀一啲人認為係一種文化打壓。好似廣州、廈門、天津英文名由Canton^[26]、Amoy、Tientsin改成Guangzhou、Xiamen、Tianjin，就令當地市民好嬲，因為呢啲舊名伴隨嗰時嘅國際聲望通行世界，已經成為城市招牌，換咗個名令人認唔出，等於損失咗品牌資源，亦令當地人喪失咗本來用母語嚟命名嘅基本權利。

教育之中，普通話拼音作為推普工具、漢字注音工具，成為唯一嘅注音標準，結果令一啲人母語水平下降，望到隻字只曉得普通話讀音，而唔知母語讀音。

而一啲人質疑拼寫嘅合理性。比如j、q、x、zh呢一類嘅拼寫，用英文來發唔似原音，有時可能連點讀都唔知，不過呢種情況喺其他一啲拼音方案入面都會有。

不過有啲人認為普通話拼音方便咗唔同地區嘅中國人溝通，並且對中文數碼檢索、圖書館學等有極大貢獻，唔可以抹殺。

註

1. 小學教學會將 y 同 w 放喺下面列出嘅21個聲母後面，變成 23 個聲母
2. 據趙元任著《國語入門》，/ts//tsʰ//s/分別發成齒音[t̪s̪][t̪s̪ʰ][s̪]
3. 字母「r」喺標準普通話度係發[ʐ]，不過有啲方言入面會發成捲脷近音[ɻ]。
4. 邵敬敏 (2011). 〈第一章、語音 第二節、音節分析：元音和輔音〉. 《《現代漢語通論》（第二版）》. 上海教育出版社. pp. 第25頁. ISBN 978-7-5444-1349-7. 擦音：成阻部位不完全封閉氣流通道，構成氣流阻礙的兩個部分之間留一條窄縫，讓氣流從中擠出，磨擦成聲。擦音除阻可以適當延長，共有6個：f[f]、s[s]、sh[ʂ]、r[ʐ]、x[ɕ]、h[x]
5. 葉蜚聲、徐通鏘 (2012). 〈第三章、語音和音系 第三節、從發音生理看語音 四、輔音〉. 《《語言學綱要》（修訂版）》. 北京大學出版社. pp. 第59頁. ISBN 978-7-301-16310-8. 北京話中大多數人「日」的起首輔音是個與與捲舌擦音[ʂ]的發音部位和姿態都相同但聲帶振動、磨擦更小的近音[ɻ]
6. 葉蜚聲、徐通鏘 (2012). 〈第三章、語音和音系 第三節、從發音生理看語音 四、輔音〉. 《《語言學綱要》（修訂版）》. 北京大學出版社. pp. 第63頁. ISBN 978-7-301-16310-8. 北京話的r有的教材上標做捲舌濁擦音[ʐ]，但實際上它的磨擦很小，當是捲舌近音[ɻ]。
7. 喺普通話拼音入面都喺韻母後面加個-r來標示兒化，除咗ê同er之外嘅韻母都可以兒化。有時兒化咗嘅實際發音唔符合拼寫，但都照原先嘅拼寫拼、再加個-r。兒化音好多時睇做音變，唯有er作為正式字音，不過唔拼聲母。
8. 字母-i拼z、c、s後面時發前高不圓唇舌尖元音，zh、ch、sh、r後面時發後高不圓唇舌尖元音，呢兩個音唔會單獨發，一定要接呢兩類聲母，對應嘅注音字母係「ㄭ」（），但好少用。舌尖元音比較罕見，普通話係一例。四呼度，雖然[i]屬齊齒呼，但舌尖元音屬開口呼。參攷《現代漢語通論（第二版）》31頁嘅普通話韻母總表。另外實際上呢兩個音標符號唔屬於現行IPA，現行IPA唔同學者有唔同寫法，見zh:國語元音圖#元音符號沿革，呢度沿用傳統嘅標音來區分呢兩隻音。
9. 音標[y]嘅字母寫法係ü，不過當ü出現喺j、q、x、y後面嘅時候幾乎都寫成u，雖然《漢語拼音方案》無硬性規定（注意，j、q、x係聲母，而y唔係聲母，而係ü行韻母喺零聲母情況下用嘅隔音字母）。而喺l、n後面要寫成ü。而家一般嘅普通話拼音輸入法度，因為ü呢種變種字母唔易打，所以會用v代替，比如「綠」嘅拼音係lǜ，打字時打成lv。
10. 喺普通話韻母總表度用失咗效嘅IPA[ᴀ]（一個細啲嘅大楷字母A），而家呢度用現行嘅IPA標示。
11. 喺韻母總表度用嘅係失效IPA[ǫ]，叫「後中圓唇舌面元音」。而-uo則同而家噉。
12. 部分語言學軟件用雙元音[ɯ̯ʌ]
13. 呢個音唔拼聲母，獨用喺「誒」「欸」呢啲嘆詞嘅字音，而有韻頭時可以拼聲母。韻母總表用嘅係舊式IPA[ᴇ]（一隻細啲嘅大楷字母E）。
14. 普通話韻母總表中，國際音標寫成[ɚ]，而部分語音學轉換軟件會使用[ɑɻ]，根據朱曉農著《語音學》，er 讀唔同聲調嘅時候音位有明顯差異。
15. 全寫係-uei，不過一般慳成-ui，比如「回」（huí）
16. 後面係-o嗰時，個韻腹發音偏後。
17. 全寫係-iou，不過一般慳成-iu，比如「柳」（liǔ）
18. 喺普通話入面-üan衹會出現喺j、q、x、y後面，所以現實中幾乎衹會寫成-uan，雖然《漢語拼音方案》無硬性規定
19. 全寫係-uen，不過一般慳成-un，比如「村」（cūn）
20. 喺普通話入面-ün衹會出現喺j、q、x、y後面，所以現實中幾乎衹會寫成-un，雖然《漢語拼音方案》無硬性規定
21. 唔接聲母，同-ong好似，注音字母亦相同，不過-ong只接聲母唔單獨發音。
22. 呢度沿用普通話韻母總表講法，不過傳統上會將-ong入合口呼，-iong入撮口呼。可見中國華文敎育網：漢語拼音拼寫的幾個問題 互聯網檔案館嘅歸檔，歸檔日期2014年9月3號，.
23. 普通話韻母總表用[uŋ]，部分語言學軟件用[ʊŋ]
24. 普通話韻母總表用[yŋ]，部分語言學軟件用[i̯ʊŋ]
25. 王力 (2002). 《汉语音韵》. 北京: 中华书局. ISBN 9787101008319.
26. 亦可以指廣東