本地生產總值
From Wikipedia, the free encyclopedia
喺經濟學上,本地生產總值(粵拼:bun2 dei6 sang1 caan2 zung2 zik6),又叫 GDP(縮寫自英文 gross domestic product),係一定時期(通常一年爲限)一個地區最終所產出嘅所有產品、勞務夾埋嘅市場總值。當中地區可以係一片大陸(例如北美洲嘅 GDP)、一個國家(例如中國嘅 GDP)、一個省(例如廣東嘅 GDP)或者一座城市(例如香港嘅 GPD)都得。
目前,喺嚴格嘅統計文件入面,英文術語 national gross domestic product(縮:'NGDP,可譯作國內生產毛額、國內生產總值)係指一國嘅生產總值,regional gross domestic product(縮:RGDP)係指一地區嘅生產總值。本地生產總值係衡量一地經濟發展狀況嘅基本指數。
而家中文入面好多時直接用縮寫 GDP,或者國內生產總值來稱呼省、市、區等唔係國嘅地方嘅生產總值。
本地生產總值同本地居民生產總值(GNP)係兩回事,本地生產總值係唔計地方間收入轉移。即係,本地生產總值講嘅係呢度出產咁多,本地居民生產總值講嘅係呢度/嗰度出產咗,當地入到袋咁多。比如,有外資喺A地開廠,佢帶咗班B地嘅工仔做嘢,呢間廠所有嘅產出,包埋外地工仔嘅人工,會計入A地本地生產總值,但班外地工走咗,佢哋份糧就計去B地嘅本地居民生產總值,就唔關A地事。