From Wikipedia, the free encyclopedia
2021年嘅喀布爾淪陷,係指2021年伊斯蘭武裝組織塔利班攻佔阿富汗首都喀布爾嘅軍事行動。塔利班自2021年5月起對阿富汗政府發動攻勢,並且喺8月15號下晝攻佔阿富汗首都喀布爾,重新成立阿富汗伊斯蘭酋長國。阿富汗總統阿什拉夫·加尼辭職走佬,代理內政部長宣佈向塔利班和平移交政權。
塔利班喺攻佔喀布爾之前,已經陸續佔領幾十個省府城市,並且喺所有省份建立武裝力量。
8月12號,包括中印美在內嘅12個國家同歐盟發表聯合聲明,話如果塔利班通過武力奪取政權,將唔會承認新成立嘅阿富汗政府[15]。
8月15號下晝,塔利班攻入首都喀布爾,控制喀布爾大學,並同阿富汗政府談判,要求後者和平投降[16]。美國駐喀布爾嘅核心團隊成員工作地點轉到喀布爾機場,而留喺喀布爾嘅美國大使館人員少過50人。而其他國家駐喀布爾大使館就「以有限人力喺合適地點運作」[17]。
阿富汗代理內政部長米爾薩瓦爾當日宣布:「政權將和平轉移,安全部隊會確保喀布爾安全」。而阿富汗總統阿什拉夫·加尼將會喺幾個鐘內宣布辭職,並且同塔利班嘅臨時政府移交權力[18]。
塔利班領導人下令避免喺喀布爾使用暴力或者傷害平民,並且畀任何選擇離開嘅人可以安全離開。佢仲要求婦女去到受到保護嘅地區[19],並且要求塔利班嘅部隊暫緩進入喀布爾城[20]。
阿富汗總統阿什拉夫·加尼喺8月15號宣布辭職[21],之後走佬去塔吉克[22]。阿富汗政府亦都派代表同塔利班喺卡塔爾舉行談判,討論政權轉移問題[23]。塔利班喺同日夜晚進入喀布爾同佔領阿富汗總統府[24][25]。
8月16號上晝,阿富汗總統加尼發表聲明,話自己已經逃離阿富汗,全民陷入恐慌,喀布爾市區道路混亂,銀行出現擠提,機場迫爆逃亡嘅平民,美軍開槍示警[26][27]。立場新聞報道現場有2個持械人士接近美軍嗰陣被擊斃;3個人喺軍機起飛嗰陣爬上機身但跌落地被轆死;3個人爬上軍機但從半空跌落地面死亡[28]。而俄羅斯衛星通訊社引述當地人士話美軍為咗維持秩序而向人群開槍,導致幾個人死亡[29]。由新華社前線記者提供嘅影片顯示,現場槍聲四起,仲有機關槍開火嘅聲音[30][31]。喺機場入面,現場有阿富汗人試圖搭美軍軍機逃離而堵塞跑道。由於冇辦法控制失控人群,有美軍駕駛武裝直升機衝向人群為運輸機開路,民眾四散逃命[32]。當日下晝,塔利班官方正式宣布將會建立「阿富汗伊斯蘭酋長國」,並向所有人保證,唔會有外交機構或者相關建築物成為攻擊目標,新政權將為公民同外交使團提供安全保障。[33][34]
8月17號,阿富汗塔利班宣布大赦所有前阿富汗政府嘅官員,並且要求佢哋重返工作崗位[35]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.