廣告

  「告白」跳轉到呢度。想搵其他用法，請睇「告白 (搞清楚)」。

廣告（粵拼：gwong2 gou3；英文：advertisement），粵文粵語當中又叫做告白，係種一單向溝通嘅宣傳手法，目的係想消費者接收到廣告裏頭嘅信息，或者令睇咗個廣告嘅人留低印象，一般目標係令啲潛在或現有嘅客戶買廣告裏頭嘅貨或服務。「喺一個媒體嗰度擺低廣告」嘅舉動就係落廣告。

巴士車尾廣告

基本概論

睇埋：市場學同宣傳

廣告可以話係最重要最常用嗰種宣傳手法。喺市場學上，廣告嘅定義係指一啲非個人性嘅單向資訊傳遞方式，目的係想提升消費者買一件產品嘅意慾；「非個人性」意思即係話傳遞嘅資訊係由賣家一嘢傳遞俾所有買家嘅，唔似得上門做銷售噉會有專人一對一同買家講嘢；廣告可以係一幅靜態嘅圖又得、係影片都得，可以出現喺好多唔同地方​——​廣告可以以電子形式出現喺電視同受歡迎嘅網站嗰度、以實物嘅形式出現喺街或者大型建築物嘅外牆嗰度、或者（廿一世紀少見咗）以印刷嘅形式出現喺雜誌同報紙嗰度... 呀噉^[1][2]。

一間公司請個人揸住個廣告牌企喺路口。

打廣告戰

呢條街有一柞招牌；間間公司都想爭消費者嘅注意力。

睇埋：監犯困境

廣告戰係指唔同公司之間鬥用廣告爭客嘅現象，可以用博弈論嘅方法分析。想像兩間同行嘅公司，${\displaystyle {\text{A}}}$ 同 ${\displaystyle {\text{B}}}$，原則上，每間公司都大致上有兩個選擇^{[註 1]}：

• 揼多啲錢嚟賣廣告同諗計提高廣告嘅質量，以求壓倒第啲公司（背叛）；
• 同第啲公司達成協議，一齊唔賣咁多廣告，減少賣廣告方面嘅開支（合作）；

報償矩陣如下：

	${\displaystyle {\text{B}}}$ 揀合作	${\displaystyle {\text{B}}}$ 揀背叛
${\displaystyle {\text{A}}}$ 揀合作	R, R	S, T
${\displaystyle {\text{A}}}$ 揀背叛	T, S	P, P

原則上，大家齊齊唔賣廣告係一個理想嘅情況​——​設計廣告同賣廣告冚唪唥都係錢同時間，唔賣廣告可以慳返好多資源，${\displaystyle {\text{R}}>{\text{P}}}$；問題係，如果是但一間公司郁手賣廣告，（假設啲廣告能夠有效噉吸引消費者）佢就有得搶走對方啲客，即係話 ${\displaystyle {\text{T}}>{\text{R}}>{\text{S}}}$；同時如果冇賣開廣告嗰間公司揼錢賣廣告，就可以爭啲客返嚟，即係 ${\displaystyle {\text{P}}>{\text{S}}}$；如是者，${\displaystyle {\text{T}}>{\text{R}}>{\text{P}}>{\text{S}}}$，兩間公司明明大家一齊唔賣廣告就可以得益最大化，但係兩間公司唔信任對方，「大家齊齊賣廣告」係一個拿殊均衡點，於是兩間公司就陷入廣告戰，而廣告成本一增加，就會損害兩間公司嘅利益^{[註 1]}。亦都可以睇吓市場結構上有關「一個市場易唔易進入」（易進入表示易出現新嘅競爭者）方面嘅問題。

爭議例子

企業成日都會搵舉牌女郎幫手舉廣告，但係呢種做法引起咗唔少爭議。

• 置入式廣告
• 心理操縱術
• Metaverse

睇埋

• 點擊率
• 數碼鬅客

註釋

1. 可以睇吓 The Prisoner's Dilemma in Business and the Economy。

引咗

1. Arens, William, & Michael Weigold. Contemporary Advertising: And Integrated Marketing Communications (2012).
2. Belch, George E., and Michael A. Belch. Advertising and Promotion: An Integrated Marketing Communications Perspective (10th ed. 2014).