中年好聲音2
From Wikipedia, the free encyclopedia
《中年好聲音2》(英文:Midlife, Sing & Shine! 2),係香港無綫電視嘅歌唱比賽節目,《中年好聲音》第二季,由車婉婉主持。
前奏節目《中年好聲音2 Ready! Go!》喺2023年9月3號禮拜日22:00到22:30喺翡翠台播出,而正式比賽就喺同年9月10號開始逢禮拜日21:00到22:30喺翡翠台播出;2024年1月7號開始改為逢禮拜日20:30到22:00播出,播到3月17號誕生總決賽七強。總決賽《中年好聲音2登峯之戰》喺3月24號禮拜日20:00到22:30播出。
同上季一樣,節目公開招募35歲或以上嘅人參加,而呢一季篩選出108位入圍參賽者,當中比較出名嘅參賽者包括曾經喺ViuTV《全民造星III》攞第9名嘅歌手黃劍文、曾經喺無綫電視《超級巨聲》攞第5名嘅歌手劉威煌、前ViuTV藝員羅沛琪、前亞洲電視藝員戚黛黛、前無綫電視藝員郭栢榮、前歌手陳蒨葶等等。
比賽最後由古淖文、譚輝智同顏米羔分別攞冠、亞、季軍,而譚輝智同時攞到「觀眾最愛好聲音」。
比賽完後另外有一集特別篇《中年好聲音2 紅白大戰》,由男女選手各九位(另由《中年好聲音》嘅周吉佩同支嚳儀分別擔任領隊)進行男女比併,喺2024年4月14號禮拜日21:15到23:15播出。