From Wikipedia, the free encyclopedia
世界協調時間(法文:Temps Universel Cordonné;英文:Coordinated Universal Time;統一縮寫:UTC),又叫做國際標準時間、世界標準時間、協調世界時同埋世界統一時間,係目前最重要嘅全球時間協調標準。
世界協調時間係由幾個國家嘅授時天文臺一齊發起嘅,到1963年由國際電訊諮詢委員會嘅第374號建議正式公佈實行。建議付諸實行之後,世界協調時間作過幾次調整,直到1972年為咗簡化調整程序而引入閏秒為止。目前,世界協調時間嘅定義係由國際電訊聯盟通過TF.460-6號建議《標準頻率與授時訊號發佈》(Standard-frequency and time-signal emissions)[1]所規定嘅,以原子時嘅秒為基準,又容許通過加閏秒,來彌補地球自轉減慢造成嘅時間差,或者將同格連尼治標準時間嘅時間差維持喺0.9秒之內。總部喺巴黎嘅國際地球自轉與參考系服務(法文:Service international de la rotation terrestre et des systèmes de référence;英文:International Earth Rotation and Reference Systems Service)決定幾時加閏秒。自從世界協調時間實行之後,一共加過27次閏秒,最後一次加閏秒係喺2016年12月31號。
「世界協調時間」嘅法文首字母縮寫係TUC,英文首字母縮寫就係CUT,英法兩派都希望自己嘅首字母縮寫成為國際標準,於是爭論不休。1970年,喺國際電訊聯盟嘅大會上面,兩派決定妥協,用UTC[2]。
世界協調時間將全球分成25個一般時區。由於本初子午線位於英國,所以英國嘅時間記做UTC+00:00。英國時區東邊嘅時區嘅時間一般UTC+XX:XX,每向東行一個時區就加一個鐘頭,加幾多個鐘頭就叫做「東幾區」,直到去到國際日期變更線為止;英國時區西邊嘅時區一般記做UTC-XX:XX,每向西行一個時區就減一個鐘頭,減幾多個鐘頭就叫做「西幾區」,又係直到去到國際日期變更線為止。
南極全境用UTC+00:00標準時間,但係各國嘅研究站可以跟返自己國家嘅標準時間。
有啲地方嘅時間同隔離時區嘅時間相差唔係一個鐘: