新界西 係指香港新界西面嘅地區，根據香港行政區劃，範圍包括荃灣區、葵青區、屯門區、元朗區及離島區，亦係香港立法會地區直選嘅選區之一。雖然新界西唔係一個官方嘅地區行政名，但好多政府機構都用新界西作為地區劃分（定義可能唔同）。因為新界西除離島外各區好早已經有公路（青山公路）貫通，發展情況都幾近，居民往來亦比較多。