雲尼斯達萊

雲尼斯達萊（Ruud van Nistelrooy，1976年7月1號—，花名「雲佬」）係一個荷蘭退休足球員同現役足球教練，球員生涯踢前鋒。佢曾經效力荷蘭足球代表隊，但喺2008年歐洲國家盃完咗之後宣佈退出。2024年10月28日做咗曼聯暫代主教練。

雲尼斯達萊

個人資料
全名	Rutgerus Johannes Martinius van Nistelrooij
花名	雲佬（Van the Man）
生日	(1976-07-01) 1976年7月1號（48歲）
出生地	荷蘭北布拉班特省
身高	1.88米
位置	前鋒
青年軍
年	球會
? –97	丹保殊
效力過嘅球會
年	球會	上陣（入波）
1993-97 1997-98 1998-01 2001-06 2006-10 2010-11 2011-2012	丹保殊 海倫芬（外借） PSV燕豪芬 曼聯 皇家馬德里 漢堡 馬拉加	69（17） 31（13） 67（62） 150（95） 68（46） 36（12） 28（4）
代表隊
年	代表隊	上陣（入波）	（入波）
1998–2011	荷蘭	70（35）
執教過嘅球會
2014–2016	荷蘭（助理）
2016–2022	PSV燕豪芬（青年隊）
2022–2023	PSV燕豪芬
2024–	曼聯（暫代）

簡歷

雲佬喺1993年以青訓球員身份加入當時係荷蘭乙組球會嘅丹保殊（FC Den Bosch），開始佢嘅職業足球員生涯，佢為球隊上陣過69場射入17球。1997年加盟荷蘭另一支球隊海倫芬（SC Heerenveen），為球隊上陣31場射入13球。佢喺22歲生日嗰日以420萬英鎊轉咗去PSV燕豪芬（PSV Eindhoven），打破當時荷蘭本土轉會費紀錄。佢喺PSV燕豪芬首季已經射入31球成為嗰屆荷蘭聯賽嘅神射手，但喺歐洲金靴獎以2分之差輸咗畀英格蘭射手菲臘斯，得個亞軍，同年佢成為荷蘭足球先生。佢喺2000年4月右膝受傷，搞到冇得踢2000年歐洲國家盃。後來佢成功克服膝傷，於2001年3月再次返翻球場比賽。佢喺效力PSV燕豪芬期間上陣聯賽67場射入咗62球。

雲佬喺2001年7月1號以破紀錄1900萬英鎊轉咗去英格蘭超級足球聯賽（英超）球隊，有「紅魔鬼」之稱嘅曼聯（Manchester United），着起咗10號波衫。佢踢曼聯首季已經為球隊上陣32場射入23球，憑住佢本人出色嘅表現，贏得2002年英格蘭最佳球員。但荷蘭喺FIFA世界盃外圍賽出局，再次令雲尼斯杜萊錯過國際大賽。2002/2003球季，佢除咗為曼聯贏取英格蘭超級聯賽冠軍外，重打破咗曼聯球員喺歐洲賽事入球嘅紀錄，而獲得2003年歐洲足球協會最佳前鋒嘅美譽（喺02/03歐洲聯賽冠軍盃上陣9場入12球，成為嗰屆嘅神射手）。

2003年11月19號，荷蘭喺歐洲國家盃外圍賽對蘇格蘭嗰陣，球隊喺首回合落後1球下，靠佢連中三元，最終贏6-0出線。

2004年佢代表荷蘭參加歐洲國家盃，首次出席大賽。首場對德國就憑佢入波追和對手。荷蘭雖然輸咗畀捷克，但係又可以以小組賽次名出線。最終荷蘭喺四強不敵東道主葡萄牙。

喺2006年FIFA世界盃外圍賽之中，雲佬係以荷蘭神射手嘅姿態進入32強。矢志要博取曼聯領隊阿力士·費格遜爵士支持嘅雲佬，喺3場分組賽賽事之中，只係入咗一球。喺16強大戰葡萄牙嘅賽事之中，荷蘭隊教練雲巴士頓（Marco Van Basten）更要佢做後備，直至完場雲佬都冇出過場。嗰場比賽之中，荷蘭以一球輸咗畀葡萄牙，而場波更出現16張黃牌，4張紅牌，打破世界盃單場賽事發出最多紅黃牌嘅記錄。

其實喺曼聯生涯嘅尾段，雲佬同曼聯領隊兼主教練費格遜唔妥嘅情況已經有惡化嘅趨勢。有時因為特別原因，雲佬間唔中會俾費格遜雪藏，或者冇狀態而被編做後備，上陣次數大減；而費格遜起用嘅曼聯另一法國籍前鋒沙夏（Saha）表現亦不過不失，喺費格遜開始重用沙夏嘅環境之下，雲佬雖然重好想留喺曼聯，但亦自覺冇癮而開始想轉去其他球隊發展。喺2005/2006年球季嘅最後階段，費格遜同雲佬嘅關係終於決裂，喺2006年世界盃之後，雲佬就以大約1030萬英鎊過檔去喺西班牙甲組足球聯賽打滾嘅頂級球會皇家馬德里足球會（Real Madrid，簡稱「皇馬」）。

喺雲佬效力曼聯嘅五個球季，一共二百幾場嘅比賽入面射入對手龍門嘅波達到150球，呢個紀綠絕對能夠列為神射手級別。除此之外，佢喺足球場上獲得嘅榮譽亦唔少，先後奪得過歐洲地區嘅「足球先生」、「神射手」等獎項，又創下多項歐洲地區嘅最多入球紀錄，其中包括自英超開始以來，第一位球員喺連續八場波都有「士哥」（入波）。

2006年轉會事件

雲尼斯杜萊

雲尼斯杜萊曾經效力曼聯

喺2005/06年球季就嚟完嘅最後一場聯賽賽事，雲佬因為唔妥領隊阿力士·費格遜唔畀佢做正選，喺賽前好嬲咁自己離隊返咗屋企。有傳話雲佬喺賽前曾經同葡萄牙籍嘅隊友基斯坦奴朗拿度（C朗）嗌過交，重爭啲喐手，事緣話因為喺隊伍操練嗰時，雲佬攞C朗死咗嘅阿爸嚟講笑，語中有骨咁話佢同一樣係葡萄牙人嘅曼聯助教昆洛斯好似父子咁，暗示助教處處偏坦C朗，令C朗極度唔妥而發生衝突；因為雲佬已經唔止一次喺操練時同隊友口角或者郁手，費格遜容忍到咗極限，驚住咁落去球隊好可能會出現分化情況，唯有安排雲佬坐後備席以示懲戒，點知反而招嚟雲佬喺最後一場聯賽前嘅離隊出走，開動咗「費雲恩怨」嘅計時炸彈。

後尾曼聯老闆同費格遜開會考慮要將雲佬「放盤」，希望搵西班牙球會馬德里體育會（Club Athletic Madrid，簡稱「馬體會」）交換旗下一位年青猛將費蘭度托利斯（Fernando Torres），馬體會梗係唔會咁輕易就用一個年輕猛將換取年屆三十嘅雲佬，於是就開價除咗球員互相交換重要另加一千萬英鎊，曼聯見對方獅子開大口，於是交易就不了了之，而馬體會會長後來再發表聲明，話托利斯係非賣品，唔使再搵佢哋開價。再後來又傳出曼聯高層願意將雲佬以低價一千萬英鎊賣出去，當時意大利甲組足球聯賽球會國際米蘭（Inter-Milan）即刻話有興趣，但呢件事因為2006年FIFA世界盃開鑼而暫時擺埋一邊。

世界盃之後，西甲勁旅皇家馬德里加入要搶雲佬過檔，但係雲佬自己話想去德國搵食，目標係德國甲組冠軍隊伍拜仁慕尼黑（Bayern Munich）。曼聯於是開價一千八百萬英磅同皇馬交涉，但係皇馬淨係願意畀一千萬磅轉會金嚟買雲佬，雙方討價還價之後，皇馬願意用一千二百萬英磅作為收購條件，而且應承如果雲佬喺賽季之後成為嗰年嘅神射手，會額外畀多一百萬英磅作為酬謝獎金，但係曼聯決意將雲佬嘅轉會金鎖定一千五百萬英磅，於是呢單交易呈膠着狀態；期間皇馬官方網站出錯將雲佬已加盟皇馬嘅消息對外公佈，冇幾耐之後即刻刪返，重要嗱嗱臨同廣大傳媒澄清同埋道歉。呢個時候嘅拜仁仍然對雲佬加盟抱有好大嘅信心。

2006年7月底左右，費格遜單方面表現溫和咁話，如果雲佬仍然留低幫曼聯打江山，所有人都會因為咁而高興，暗示主僱嘅關係有冰釋嘅可能。但另一邊廂喺曼聯老闆格拉沙（Glazer）嘅推波助瀾同施壓之下，球會終於喺同月嘅28號同皇馬達成初步協議，同意收取大約一千五百萬歐元（約一千零三十萬英磅）將雲佬賣畀皇馬，重喺同月29號通過體檢，正式簽咗三年合約，成為皇馬旗下嘅殺手。雲佬喺接受傳媒訪問時話，佢好感謝費格遜當初願意等待一個球季嚟畀佢養傷，傷癒之後仍然肯出高價將佢帶入曼聯，諗返真係欠費格遜好多，不過因為師徒關係已經達到決裂重要係無可挽救嘅地步，唯有忍住萬般悲痛咁離開曼聯。費格遜亦回應話雲佬的確係一個好球員，但係因為紀律問題而俾人放喺後備廂係每個球員都應該接受，唔明點解雲佬咁睇唔開。

皇馬歲月

初初加入皇家馬德里嘅雲佬並冇辜負自己嘅盛名，喺季前練習同啲新隊友一齊練傳波，佢嘅入波百份比高過晒其他人，展示一手射門技術令在場嘅隊友同教練個個睇到眼凹凹，暗中讚佢好嘢。跟住幫皇馬踢熱身賽已經有入波，開展佢喺皇馬嘅光輝歲月。

聯賽開鑼冇幾耐，喺一場作客對利雲特（Levante）嘅賽事入面，雲佬大演帽子戲法，喺初踏足嘅西班牙土地之上大顯光芒。

同年，即同樣係06-07年嘅西甲賽季，喺皇家馬德里作客奧沙辛拿（Osasuna）一場，雲佬更上演大四喜，個人包辦晒四個入波，表現出驚人嘅入波能力，兼受到球會領隊卡比路極力讚賞；憑住不斷嘅入波，雲佬喺呢個賽季除咗勇奪西甲神射手獎之外，所效力嘅皇家馬德里亦重奪西甲錦標成為06-07年度冠軍。

2008年1月，雲佬同皇馬簽新約到2010年6月30號。佢喺同年3月做手術，5月復出，對巴塞隆拿後備入替兼有入波。2008年尾，佢又因為手術而缺陣，去到2009年季前熱身賽至復出。其後佢打完球季第一場西甲之後再次受傷，缺陣幾個禮拜。

後皇馬歲月

2010年1月，雲佬同漢堡簽約到2011年6月；約滿後再自由身免費轉投馬拉加，簽約一年，最尾喺2012年5月14號宣佈掛靴。

教練生涯