玩家(粵拼:waan2 gaa1 | 英文:player / gamer),粵語口語又可以學英文叫 gamer,指玩遊戲嘅人。玩遊戲最初只係一項業餘活動,但係依家已經演變成一種職業。
- Solo:喺網上遊戲當中唔參與團隊、甚至唔同其他玩家互動、自己一個人玩嘅玩家。
- Scrub:指覺得隻遊戲嘅官方規則「唔公平」而自設規則、仲嘗試迫第啲玩家跟佢哋嗰套規則嘅玩家[橋 1]。
- 懷舊玩家(retro gamer):鍾意舊式遊戲嘅玩家;遊戲製作師有陣時會為咗氹呢啲玩家,而專登喺隻遊戲度加啲懷舊嘢(例如似舊式遊戲噉嘅圖像)[1]。
- 破壞者:喺多人電子遊戲當中特登做啲嘢嚟令第啲玩家唔開心嘅玩家;例如可能喺一隻 MMORPG 裏面,有玩家成日惡意噉喺留言版上面留啲中傷性嘅留言,呢啲玩家就係破壞者[2]。
- 觸手:喺動作遊戲當中對高手嘅稱呼。噉係因為呢啲高手好多時有接近人類極限嘅反應同手眼協調,俾人話佢哋唔係用兩隻手玩,而係好似八爪魚噉用八隻觸手[3]。
- 按認真程度分[4]:
- 休閑玩家(casual):對遊戲唔太認真、玩嚟純粹為開心嘅玩家。
- 核心玩家(core):對遊戲認真嘅玩家,會嘗試提高自己技術,但未至於去到有競爭性。
- 硬核心玩家(hardcore):好認真嘅玩家,鍾意參與比賽同人競技,通常技術上勁過休閑玩家同核心玩家。
- 職業玩家(pro):靠玩遊戲作為事業賺錢嘅玩家;可以睇埋電子競技。
- 新仔(newbie):指經驗尚淺、技術未成熟嘅玩家[5]。
- Newb:新仔一種,通常指態度良好、肯聽前輩勸嘅新仔[橋 2]。
- Noob:通常指態度惡劣、明明玩唔掂都唔聽勸嘅新仔;Noob 成日都會拖累同佢哋同隊嘅老練玩家(仲要態度囂張)而廣受人厭惡。Noob 呢隻字有陣時亦會俾人用嚟做普遍嘅辱罵。
- 假新仔:實際上實力極高、但用低等級戶口扮成新仔嘅玩家[6]。
巴圖玩家分類法係一套將玩家按「玩遊戲嘅動機」分成幾類嘅方案,成日俾人攞嚟做遊戲設計上嘅理論性質討論[7];根據巴圖玩家分類法,玩家可以分做
- Achiever-鍾意喺遊戲入面攞高分同收集遊戲裏面嘅徽章(徽章係一啲成功做到某啲嘢就會得到嘅嘢)、
- Explorer-熱衷於探索遊戲內嘅世界,會想搵到嗮所有隱藏嘅嘢、
- Socializer-在乎嘅遊戲嘅社交性,例如想要隻遊戲可以攞嚟喺聯歡會上同朋友一齊玩、
- Beater-競爭性強,鍾意隻遊戲俾機會佢哋同第啲玩家競技、
- Completionist-成就者同探索者嘅合體,想要完美噉完成遊戲嘅內容同埋搵出隻遊戲所有嘅秘密(睇埋 100% 完成);
遊戲設計學者指出,遊戲製作師要考慮佢哋隻遊戲傾向吸引邊種玩家,按此調整隻遊戲;例如如果知道隻遊戲吸引嘅玩家以社交者為主嘅,噉製作組就要諗多啲計,方便隻遊戲多人一齊玩[7]。
Holin Lin, Chuen-Tsai Sun (2007), ""White-Eyed" and "Griefer" Player Culture: Deviance Construction in MMORPGs", Worlds in Play: International Perspectives on Digital Games Research, pp. 106.
Smith, A. M., Lewis, C., Hullett, K., Smith, G., & Sullivan, A. (2011). An inclusive taxonomy of player modeling. University of California, Santa Cruz, Tech. Rep. UCSC-SOE-11-13.