From Wikipedia, the free encyclopedia
熊狸,英文名 Bearcat 或 Binturong(來自馬來語,另有講法來自他加祿語),學名Arctictis binturong。係一種靈貓科動物。熊狸屬於蹠行動物,行路嘅時候腳掌着地,呢點同熊相似;熊狸嘅眼一遇到強光會變成一道鋻縫,呢點就似貓。熊狸嘅名字就係由呢兩點相似性嚟命名嘅。
![]() |
熊狸生活喺雨林,長年響樹上活動。熊狸分布喺東南亞、越南、婆羅洲、馬來西亞、印尼、菲律賓等。中國雲南都有分布。因為砍伐森林行為嚴重破壞佢哋嘅棲息地,加上偷獵令佢哋嘅數量驟減。而家熊狸喺好多國家正處於瀕危狀態。熊狸有三個亞種,半島亞種分布喺菲律賓,其餘亞種分布喺菲律賓以外嘅地方。半島亞種係體形最大嘅亞種。
熊狸係一種夜行動物,日頭喺樹上面瞓覺,夜晚出嚟。
熊狸身長60-95厘米,重9-14公斤。條尾同個身差唔多咁長。作為靈貓科成員,熊狸有好多特立獨行嘅地方。熊狸係靈科中體形第二大嘅種類,乸體形比公大20%。同時,熊狸亦係靈貓科之中唯一生素色皮毛嘅動物,其他靈貓科成員一般都帶斑紋。熊狸乸嘅性器官居然生得似公嘅性器官(因為有陰蒂骨,呢點好似鬣狗),事實上,雌雄性器官相似係貓形亞目嘅一種原始特徵嘅遺留。
另外,熊狸亦都係靈貓科之中唯一條尾有抓握功能嘅動物。佢嘅尾生有蓬鬆粗糙嘅毛,具有抓握功能,起到第五隻手嘅功能。實際上,只有兩種食肉目動物嘅尾有咁嘅功能,熊狸喺其中之一。而且喺東半球,熊狸重係唯一條尾有抓握功能嘅哺乳動物。熊狸生小圓耳,細眼。雖然屬於食肉目,但係犬齒唔發達,切齒亦唔似其他食肉類咁特化。主要食果實,亦都食鳥蛋、嫩葉、嚙齒動物同雀鳥。同熊一樣,熊狸係一種歸入食肉目嘅雜食性動物。
熊狸喺受威脅嗰陣會變得非常之惡,而喺開心嗰陣會發出咯咯笑嘅聲。喺人工飼養下,熊狸可以活20年,最高記錄26年。對同等體形嘅動物中已經算係長命。
熊狸識爬樹,能夠喺樹枝間跳躍攀爬搵食,同時利用條尾纏繞樹枝協助維持平衡。佢哋嘅後肢能夠往後彎曲好大嘅角度,以便頭向下由樹上爬落嚟。
熊狸用喺條尾嘅嗅腺喺樹上蹭擦來標記地盤,同其他同類進行嗅覺交流,爬樹嗰陣會留低一條嗅痕。熊狸嗅腺分泌嘅物質氣味經常被形容為「似熱爆穀」。
![]() |