多人線上戰鬥競技場遊戲

多人線上戰鬥競技場遊戲（英文：multiplayer online battle arena，MOBA）係一種戰略遊戲，特色係強調「一路保護自己陣地一路攻擊敵人陣地」。喺一隻典型嘅 MOBA 入面，每隊玩家會有一個固定嘅基地，並且有一柞部隊，而每位玩家嘅部隊好多時會由一個叫英雄（hero）或者冠軍（champion）嘅角色帶領，呢個英雄會好打過一般嘅卒仔好多，而且會有獨有、能夠幫助戰鬥嘅異能；玩家要嘗試用自己嘅英雄同部隊推進，攻擊對手嘅基地同埋保護自身嘅陣地，最先破壞嗮對手陣地嗰一方就贏，所以隻遊戲考嘅係玩家曉唔曉一路作出快速決策一路同隊友配合^[1]，例如係好出名嘅《英雄聯盟》（League of Legends）就係噉^[2]。MOBA 喺 2010 年代興起，而且話咁快就席捲電子遊戲界^[3][4]－喺 2018 年，MOBA 電子競技嘅獎金據估計總值超過 6,000 萬美金，佔咗嗰年嘅電子競技獎金嘅成 40% 咁多^[5]。

一隻典型嘅 MOBA 嘅地圖佈置；兩隊各有一個基地（base），地圖有幾條路（lane），玩家要以「攻陷對方基地」為目標對局。

概念

• 戰鬥路（lane）：常見於戰略遊戲，尤其係多人線上戰鬥競技場（MOBA），嘅機制；指比賽進行嘅地圖上分做若干條路，每條路可以擺若干個戰鬥單位，而一個單位喺多數情況下都只能夠同喺同一條路當中嘅單位互動（例：多數類型嘅兵只可以攻擊身處同一條路嘅敵人），令玩家焗住要有策略噉管理喺每條路擺幾多個單位。用戰鬥路機制嘅遊戲例子可以睇英雄聯盟等嘅多隻 MOBA ^[6]。