From Wikipedia, the free encyclopedia
2020年珠江口地震(又叫:2020年珠海地震)係2020年1月5號上晝6點55分喺珠江口發生嘅地震[1]。震中喺北緯22.08度,東經113.86度附近(廣東珠海香洲區海域),強度係3.5級[2][3][4][5]。另外,喺同年4月22號上晝11點35分再次喺珠海海域發生地震,震中喺北緯22.05度,東經113.41度附近(廣東珠海金灣區蓮塘灣附近海域),強度係2.2級。
喺1月5號地震,有市民喺睡夢入面驚醒,東涌、屯門、大埔等區域有居民報告感覺到地震,亦包括市區如石硤尾同九龍塘[6]。
喺4月22號地震,澳門同珠海橫琴、金灣區一帶震感比較明顯。
廣東省應急管理廳表示,1月5號地震震央同最近陸地距離約30公里,震源深度12公里,之後錄到2次餘震,冇明顯嘅海嘯波同潮位變化。近幾日原震區發生4級以上地震可能性唔大。
香港天文台喺2020年1月5號上晝7點10分發出本地有感地震報告,指收到市民報告表示感到地震,做緊分析,當有進一步資料嗰陣就會盡快公布[7];上晝7點50分,更新本地有感地震報告,據初步分析,震中距離香港嘅西南約41公里,方位232度,有市民同天文台報告表示感受到呢次地震[8];上晝8點50分,更新本地有感地震報告,指收到超過1200個市民報告,表示感受到呢次地震,震動維持幾秒。初步分析顯示香港嘅地震烈度係修訂麥加利地震烈度表嘅第IV(四)度,即懸掛嘅物件擺動、門、窗、碗碟發出響聲[9]。
香港一個月前喺長洲亦發生過地震,震央同今次地震相隔近25公里。香港天文台高級科學主任陳世倜表示,長洲地震同今次相隔一個月,兩次都係弱地震,香港唔喺活躍嘅地震帶,好難判斷兩者有關連。至於近期會唔會再有香港有感地震,佢話地震嘅隨機性較高,數據上睇唔到日後地震會唔會變得密[10]。
2020年首次地震發生喺上晝6點55分,有住喺雀仔園同黑沙居民話,上晝近7點,喺客廳感到左右搖擺,震感同平時重型車輛經過時嘅震動唔同,歷時大約1到2秒。本澳氣象局初步分析,震央距離本澳約30公里,呢次係2001年以嚟錄得最近本澳嘅地震[11]。
珠海市科技創新局話,喺4月22號11點35分01秒,喺廣東珠海金灣區蓮塘灣附近海域(北緯22.0度,東經113.4度)發生M2.2級地震,深度11千米。由於呢次震級較細,唔會對市民正常生產生活造成影響,大家唔使咁驚。而家,該局主要接到喺橫琴嘅高樓層居民嘅反饋,暫時未收到其他地區人員反映。而家,珠海未收到人員傷亡同財產損失報告[12]。
香港天文台再喺2020年4月22號下晝2點17分發出本地有感地震報告,據香港天文台嘅初步分析,2020年4月22號上晝11點35分廣東珠海附近發生一次2.2級地震,震中喺北緯22.04度,東經113.41度附近,即香港天文台嘅西南偏西約84公里。
香港天文台收到兩個市民報告,表示感受到呢次地震,震動維持幾秒。初步分析顯示本港嘅地震烈度係修訂麥加利地震烈度表嘅第II(二)度,即喺樓宇上層或合適位置,同埋喺靜止緊嘅人有感[13]。
澳門氣象局表示,喺4月22號11點35分06秒,震央喺澳門西南約21公裏海域發生地震。呢次係氣象局今年第二次錄得喺澳門100公里範圍內、震級2.0或以上嘅地震。澳門唔少喺室內嘅市民都感受到震動,氣象局亦喺嗰日截止下晝2點夾埋收到超過15個市民電話查詢[14]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.