1936年夏季奧林匹克運動會

1936年夏季奧林匹克運動會係第11屆現代奧林匹克運動會，1936年8月1號到8月16號喺納粹德國柏林搞。

呢屆奧運會，一共有49個國家同埋地區代表團參加，當中阿富汗、百慕達、玻利維亞、哥斯達黎加、列支敦士登同埋秘魯都係頭一次派出運動員參加奧運會。

焦點

• 1932年，國際奧委會將1936年奧運會主辦地定喺柏林，嗰陣時希特拉嘅納粹黨重未執政，兼且反對奧運會，宣稱「奧運會係猶太人同埋和平主義者玩嘅花臣，德國選手同黑人同場競技，有損日耳曼民族嘅尊嚴。」國際奧委會成立代表團，前往柏林調查呢個城市係咪符合舉辦奧運會嘅條件；調查團去到德國嗰陣時，啱啱趕上1933年納粹黨上台，希特拉前倨後恭，重宣佈「全力支援奧運會」。因為咁，希特拉下令政府撥款二千萬德國馬克資助柏林奧運，喺柏林起一座可以容納十萬人嘅柏林奧林匹克運動場。政府要求藝術家喺體育宣傳畫入面，展現雅利安人種嘅發達肌肉同英雄咁嘅力量，強調「雅利安人種優越論」，柏林奧運成為咗希特拉同埋納粹黨宣傳佢哋政治主張嘅舞台。1954年，國際奧委會專門發表聲明，就當年嘅錯誤選擇向公眾道歉。
  • 根據西德奧委會主席威利杜馬（Willi Daume）嘅回憶，佢永遠記得响帝國總理府舉行嘅盛大慶功會上希特拉嘅演講：「去到1940年，奧運會就喺東京舉行，我哋要用我哋嘅飛艇將數以千計嘅德國觀眾同埋體育迷送去畀你哋捧場。然後由1944年之後，奧運會將會永遠喺柏林舉行。」
• 點燃奧運聖火由呢屆開始被寫入奧運會規定，成為開幕儀式之一，之後，呢項奧運聖火接力就成為咗奧運傳統習慣。
• 美國黑人選手謝斯奧雲斯响呢屆奧運贏咗4面金牌（100米以10秒3奪冠、跳遠以8米06摘金、200米以20秒7折桂、4×100米接力同隊友合力以39秒8加冕），令呢位黑人選手以傑出嘅運動才能，喺全世界面前粉碎咗「雅利安人種優越論」。
• 韓國（時值朝鮮日治時期）運動員孫基禎响馬拉松項目取得金牌，成為頭一位贏得奧運金牌嘅韓國人。不過，孫基禎只能代表日本參賽，頒獎儀式上升日本旗、演奏《君之代》國歌。
• 萊芬斯坦拍咗一套記錄柏林奧運嘅電影《奧林匹亞》（Olympia）。對於呢套戲係咪應該同佢較早拍嘅納粹黨集會紀錄片《意志勝利》一樣，歸類做納粹宣傳影片有好多拗撬。呢套戲獲得1938年威尼斯電影節最佳影片獎。
• 原本預定1940年（配合日本皇紀2600年），由日本東京同札幌分別舉辦夏季同埋冬季奧運，但係因為侵華戰爭擴大同埋日本軍部反對，喺1938年日本政府交還主辦權，1944年亦因二戰冇得搞，令到柏林奧運成為1945年二戰打完之前嘅最後一屆奧運會。
• 被懷疑可能係最早使用禁藥嘅奧運會，因為運動禁藥類固醇類响1935年由德國人發現。