12金鴨

《12金鴨》（英文：12 Golden Ducks），係2015年上畫嘅港產片，由吳君如、劉浩龍、姜皓文、蔡瀚億主演，鄒凱光執導，另外仲有謝霆鋒、任達華、陳妍希、陳奕迅、趙薇、鹿晗、盧海鵬、薛凱琪、陳靜、黃秋生、周秀娜、李若彤、梁洛施、黃偉文、王菀之等藝人客串^[1]。

故事講述昔日鴨王萬人迷張近萊（Future張，吳君如飾演），因為感情受創遠走泰國。喺好友魯老師（黃秋生飾演）嘅激勵下，佢搵嚟貼身教練洛雞（古天樂飾演）相助重練鋼鐵人身，決定要喺香港鴨界重振雄風。點知佢賺女人錢嘅地方，已經由夜店變成老人院、暗藏春色嘅泰式菜館等…。終於一個千載難逢嘅機會，佢被當紅名媛梁李笑茜（容祖兒飾演）選中，一齊上電視跳舞，但條件係必須搵齊12位身懷絕技、各有所「長」嘅舞男^[2]…

製作過程

呢套戲其中一個廣受關注嘅賣點，就係吳君如犧牲色相、女扮男裝嘅反串演出^[2][3]。拍攝期間吳君如每次「整胸」特殊化妝，都至少6個工作人員對佢上下其手進行。吳君如又話，因為特殊化妝用到嘅，擁有人魚線同埋肌肉嘅『人造皮肌肉』有一定厚度，如果身形唔夠纖瘦，效果會顯得臃腫，所以想偷懶唔做運動都唔得，連食飯都要同幾個男模特兒一樣淨係食雞肉同菜^[4]。佢又話，自己喺呢套戲嘅形象其實係參考自己心目中嘅男神，包括梁朝偉、劉德華同張國榮^[5]。

陳妍希、趙薇、梁洛施同埋容祖兒飾演唔同尋歡嘅女性，亦成為咗一啲傳媒嘅關注所在^[5][6]。另外，亦有啲傳媒提到，吳君如同謝霆鋒上演中學時期嘅戲碼，謝霆鋒喺戲入面暗戀吳君如，而吳君如就強吻謝霆鋒，仲大玩「抓鳥遊戲」^[7]。

迴響

• 影評專頁《晞。觀影記事》喺立場新聞撰寫影評嘅時候，形容呢套戲算係群星賀歲式喜劇，以大堆頭卡士以喻港人逆境自強，有熱鬧嘅感覺，亦有帶出一定人情味同感人情節，但係劇情相對鬆散，比唔上吳君如之前嘅《金雞》^[8]。
• 影評專頁《講。鏟。片》以「吳君如的男妓大派對」形容呢套戲，指呢套戲結構較為鬆散，但亦令觀眾對於過去可以有一定嘅反思，唔同演員都有亮點，觀眾入場可得到預期所需^[9]。

參考

1. https://www.facebook.com/ETtoday。〈瘋電影／12金鴨 香港演員很團結 | ETtoday名家新聞 | ETtoday新聞雲〉。www.ettoday.net (繁體中文)。喺2020-12-29搵到。 {{cite web}}: |last= has generic name (help); External link in |last= (help)
2. 〈【12金鴨】吳君如女扮男裝 短髮蓄鬍、大露肌肌〉。《蕃新聞》 (臺灣中文)。喺2020-12-29搵到。
3. 〈《12金鴨》吳君如犧牲色相女扮男裝 短髮蓄鬍、大露肌肌 堪稱從影最man演出！ - yamMovie電影特區〉。movie.yam.com。喺2020-12-29搵到。
4. ETtoday新聞雲。〈吳君如「整胸」過程曝光 上空入鏡依然這麼帥氣！ | ETtoday星光雲 | ETtoday新聞雲〉。star.ettoday.net (繁體中文)。喺2020-12-29搵到。
5. ETtoday新聞雲。〈劉德華、張國榮、梁朝偉綜合體！用胸肌安慰陳妍希心靈 | ETtoday星光雲 | ETtoday新聞雲〉。star.ettoday.net (繁體中文)。喺2020-12-29搵到。
6. 自由時報電子報 (2015-03-16)。〈陳妍希釣大魚 讓鴨王抓奶摸下體 - 自由娛樂〉。《自由時報電子報》。喺2020-12-29搵到。
7. ETtoday新聞雲。〈當眾脫衣無恥度！吳君如強吻謝霆鋒大玩「抓鳥遊戲」 | ETtoday星光雲 | ETtoday新聞雲〉。star.ettoday.net (繁體中文)。喺2020-12-29搵到。
8. 〈12金鴨：吳君如的群星派對 | 晞。觀影記事 | 立場新聞〉。《立場新聞 Stand News》 (英文)。原著喺2021-01-17歸檔。喺2020-12-29搵到。
9. Ryan (2015-02-13)。〈《12金鴨》：吳君如的男妓大派對〉。《講。鏟。片》 (臺灣中文)。喺2020-12-29搵到。