黃竹坑

  呢篇文講香港地方。想搵第二個意思嘅話，請睇黃竹坑 (搞清楚)。

黃竹坑（粵拼：wong4 zuk1 haang1）係響香港港島南岸一笪地方，響香港仔東面，深水灣西面。響香港地區行政中，黃竹坑屬於南區，目前主要係一個住宅同輕工業區。

黃竹坑全景

黃竹坑東面嘅壽臣山一帶，曾經係香港圍嘅所在地，係香港地名來源之一。原村嘅大部分已被政府拆卸，家陣僅存黃竹坑新圍同小部分黃竹坑舊圍。

名

《粵大記》中黃竹坑嘅相關記載「鐵坑」（中間偏右上）。

黃竹坑舊時係條涌，所以叫「坑」。古時又叫鐵坑。家下工業區一帶，係涌嘅出海口，舊時叫涌尾，係水上人搭棚聚居嘅地方，有如家下大澳。

英人初到黃竹坑，就叫呢度士丹頓涌（Staunton Creek）。Creek卽係涌，而Staunton就同中環史丹頓街一樣，以東印度公司嘅士丹頓而名。士丹頓跟譚夏士出使北河，曾經實地到過呢，所以有咁名。家下條黃竹坑呢條涌，變咗條明渠，所以叫唐字叫黃竹坑渠，英字Staunton Creek Nullah。

史

黃竹坑一帶響新石器時代就有人住，現存嘅古蹟有黃竹坑石刻。到咗明朝嘉靖年間，有人響該處一帶建立香港圍，成為香港島早期具規模嘅村落之一。而當時黃竹坑西部係一個內灣，亦吸引咗唔少漁船停泊。

黃竹坑自1960年代開始開發，內灣亦被填平發展工業大廈，令黃竹坑一度成為香港嘅其中一個主要輕工業區。但隨著1990年代大部份紛紛遷移至中國大陸，製造業「日落西山」，加上香港政府銳意將香港仔同佢週邊地區發展成為一個旅遊區，黃竹坑將會轉型成三四星級酒店為主嘅酒店區，部份工廠大廈會改建成酒店。

地標

• 香港仔運動場
• 香港警察學院
• 香港海洋公園
• 聖神修院
• 香港仔工業學校

睇埋

• 黃竹坑道，位於黃竹坑嘅一條主要道路，部分路段屬香港1號幹線。
• 黃竹坑站，港鐵南港島綫嘅一個中途車站，位於黃竹坑工業區側邊。
• 黃竹坑車廠 (港鐵)，港鐵南港島綫嘅車廠，前身係黃竹坑邨。
• 黃竹坑車廠 (城巴/新巴)，城巴同新巴共用嘅車廠。
• 黃竹坑明渠，位於香葉道旁嘅一條主要明渠，源於班納山附近。
• 黃竹坑選區，南區區議會轄下一個選區，現任區議員係徐遠華。
• 黃竹坑舊圍，古時亦稱香港村、香港圍，係位於香港仔隧道黃竹坑入口附近嘅一條鄉村。
• 黃竹坑新圍，係黃竹坑舊圍嘅擴建部分，係位於香港仔隧道黃竹坑入口東南面嘅一條鄉村。
• 黃竹坑新圍舊民居，位於黃竹坑新圍10號，2009年正式被列為二級歷史建築。
• 黃竹坑醫院，由醫院管理局管理嘅一間醫院，屬黃竹坑老人服務綜合大樓嘅一部分，位於南風道西方入口附近。
• 黃竹坑巴士總站，喺南朗山道同警校道交界處附近嘅一個露天巴士總站。
• 黃竹坑谷，即係壽臣山，一座位於深水灣附近嘅小山丘。
• 黃竹坑石刻，史前時期遺留低嘅石刻，近南風道，已被列為法定古蹟。
• 黃竹坑天主教小學，以前一間政府資助學校，因香港政府喺2005年宣佈清拆黃竹坑邨而被迫停辦。