From Wikipedia, the free encyclopedia
香港警務處國家安全處(簡稱警方國安處,英文:National Security Department),係香港警務處根據《香港國家安全法》設立嘅維護國家安全部門,喺2020年7月1號正式成立[1][2]。國家安全處由一個警務處副處長做負責人,係行動同管理以外嘅第三個副處長,架構同港英時期嘅政治部類近[3]。國家安全處處長由一個警務處高級助理處長出任,下設兩個負責國家安全嘅警務處助理處長。
警方國安處可以從香港以外嘅任何地區請受訓執法人員「協助執行」國安職務[4][5]。警方國安處需要配合中央駐港國安公署執法[6]。
2020年7月3號,警務處高级助理處長兼監管處處長劉賜蕙晉升為副處長(國家安全);香港政府亦同時委任佢兼任做國家安全委員會成員[7]。2023年4月底,劉賜蕙夠年齡退休,高級助理處長簡啟恩喺5月2號接任副處長(國家安全),助理處長江學禮接任國安處處長。
國家安全處而家由警務處副處長(國家安全)領導,向警務處處長負責,現任負責人係簡啟恩。設有國安處處長一職,而家由江學禮做緊,職級係警務處高級助理處長,警務處助理處長(國家安全)係趙詠蘭同王忠巡,總警司(國家安全)係張惠華同李桂華[8]。
警方國安處嘅警察除咗有喺《香港國家安全法》通過之前所賦予嘅調查案件權力之外,仲被授予咗國安處新嘅權力。國安法《第四十三條實施細則》規定,國家安全處可以搜查可能存有犯罪證據嘅處所、車輛、船隻、航空器同埋其他有關地方同電子設備,唔再需要經過法院批准[9]。警方國安處只需要經過行政長官批准,就可以對有合理理由懷疑涉及實施國家安全犯罪嘅人進行截取通訊同秘密監察,唔再需要依照之前《截取通訊及監察條例》嘅規定要先攞到法院授權[9]。
自2023年5月,警務處副處長(國家安全)簡啟恩係國安處負責人,同時兼任國安委成員;江學禮做緊警務處高級助理處長兼國家安全處處長;趙詠蘭同王忠巡做緊警務處助理處長(國家安全),張惠華同李桂華做緊總警司(國家安全)[10]。
喺2022年7月,曾幫助黎智英辯護倫敦著名嘅大律師事務所「Doughty Street Chambers」三位大律師,即係英國御用大律師加拉格爾(Caoilfhionn Gallagher)、高級大律師Jonathan Price同埋Jennifer Robinson,佢地個Gmail戶口都接到警方國安署電郵,話佢地犯咗港區國安法,言詞間仲恐嚇佢地可能會隨時比人引渡返香港。喺同年7月7號,個律師團隊發聲明,話已經同聯合國人權高級專員辦事處嘅「任意拘留問題工作組」(Working Group on Arbitrary Detention)提出緊急申訴,指控港府對黎智英長期未審先囚係犯咗國際法,呼籲工作組即刻採取緊急行動。之後,加比格爾仲話,呢啲恐嚇手段現正喺中國同香港以外嘅地方蔓延。佢又強調,黎智英指示律師幫佢喺聯合國上維護自己權利嘅行為,竟然比當局老屈話具有顛覆性,咁係好令人擔心,仲話咁做係破壞咗法治同國際保護人權嘅機制[11]。
2020年11月9號,美國財政部宣佈,轄下外國資產控制辦公室已經採取行動制裁4名人士[12],同港區國安法有關,被制裁嘅人士包括時任國安處負責人劉賜蕙、國安處高級警司李桂華[13]。
2021年1月15號,美國財政部進一步宣佈制裁包括時任國安處處長蔡展鵬,時任助理處長簡啟恩同江學禮在內嘅6名中港官員[14]。被執行制裁嘅人士除咗佢哋喺美國嘅資產會被凍結外,喺海外同香港嘅銀行服務亦可能會被取消[15]。2021年3月2號,蔡展鵬向恒生銀行還清佢獨資持有嘅火炭御龍山單位按揭貸款,當時單位市值大約港幣1300萬。[16]
2021年5月12號,香港多間傳媒報道,當時嘅警務處國安處處長蔡展鵬喺一個多月之前幫襯俗稱「骨場」嘅無牌按摩院嗰陣,遇上掃黃行動[17],蔡展鵬被夥記發現係無牌按摩院嘅其中一個顧客。幾日之後,總警司黃維話,警方喺3月尾嘅巡查行動入面,喺灣仔區一間無牌按摩店發現蔡展鵬,並懷疑有人經營色情場所同提供賣淫服務,拘捕咗6個有香港身份證嘅女人,但唔包括蔡展鵬。而事後有部份香港市民戲稱國安處係「邪骨處」,而處長係「骨精鵬」。[18]最後香港政府冇追究,蔡展鵬留任警務處高級助理處長,但平調做人事及訓練處處長。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.