香港一百蚊紙

一百蚊紙（100元紙幣）係現時香港流通貨幣之一，面值100港元，目前分別由香港3間發鈔銀行發行。由於最大發鈔銀行──香港上海滙豐銀行長期以來嘅100蚊紙都係以紅色為主調，所以香港民間俗稱「紅衫魚」。以鈔票冧巴計，100蚊紙嘅發行量僅次於20蚊紙。

100蚊紙早喺19世紀中已由當時3間發鈔銀行──香港上海匯理銀行（即後來嘅滙豐銀行）、印度新金山中國匯理銀行（即後來嘅渣打銀行）同埋印度倫頓中國三處匯理銀行（即後來嘅有利銀行）發行。直到二次大戰以前，3間發鈔銀行嘅100蚊紙設計分別出現咗幾次變化，尺寸、顏色、風格一直都有唔同。

戰後，3間發鈔銀行繼續出戰前樣式嘅100蚊紙。直到1959年，滙豐銀行同埋有利銀行改咗100蚊紙嘅設計，兩間銀行嘅鈔票除咗大幅縮細之外，亦採用同樣尺寸同埋色。不過實際上，滙豐銀行嘅鈔票圖案設計改動唔大。1961年，渣打銀行亦重新設計鈔票，尺寸同其他銀行一樣，但繼續係綠色。

喺1970年，渣打銀行大幅更改鈔票設計，終於改以紅色為主調。滙豐銀行同埋有利銀行亦相繼喺1972年同埋1974年改鈔票設計。不過，有利銀行嘅新鈔票只係喺1974年出過一次，之後就再冇出銀紙。而渣打銀行喺1979年又再重新設計一系列鈔票，以中國傳統瑞獸為題材，當中100蚊紙用咗「麒麟」。

自1985年起，兩間發鈔銀行重新設計100蚊紙，尺寸再度「縮水」，變成家下嘅大細。1989年，滙豐銀行改以淺紅色同埋桃色印刷100蚊紙，原因可能係原有設計嘅色太深，同樣現象亦出現喺20蚊同埋1000蚊紙身上。而滙豐銀行亦曾經喺1979年改以淺紅色印刷100蚊紙，取代原有嘅深紅色。

喺1993年，兩間發鈔銀行因應香港主權移交臨近，改咗原本帶有英國色彩嘅鈔票設計。不過，渣打銀行嘅鈔票變動唔大，沿用以往嘅「麒麟」圖案。到咗1994年，中國銀行香港分行（即後來嘅中銀香港）亦加入發行100蚊紙。

喺2003年，3間發鈔銀行嘅100蚊紙設計一齊改，加入相近嘅防偽特徵。

咁啱得咁巧，現時最新版人民幣100蚊紙同埋新台幣100蚊紙，都是以紅色為主調。

歷史