供應同需求

供應同需求（粵拼：gung1 jing3 tung4 seoi1 kau4）係一套微觀經濟學理論，研究貨品服務嘅需求量同供應量點樣決定件貨品服務嘅價格。喺一個市場入面，是但搵一樣俾人買賣緊嘅貨品或者服務，佢會至少有兩個屬性：價格同埋數量。供應同需求嘅理論就解釋價格同數量之間嘅啦掕。喺微觀經濟學上，呢個理論能夠預測喺一個有完全競爭（指冇任何一個買家或者賣家大到有能力獨力掌控啲貨品服務嘅價格）嘅市場下嘅貨品同服務嘅價格^[1]。

一條改變緊嘅需求曲線（D）同埋一條唔郁嘅供應曲線（S）；呢幅圖反映一個需求提升（由 D₁ 去 D₂）。

嗌法

• 供應：supply
• 需求：demand
• 價格：price
• 數量：quantity

需求

内文：需求

喺一個市場之下，對一件貨品服務嘅需求指需求量（買家有能力同肯買嘅量）同價格之間嘅關係。例如有件貨品服務，佢價格喺 10 文嗰陣啲買家總共會買 100 件，價格喺 9 文嗰陣啲買家總共會買 110 件... 等等嘅話，佢嗰條需求曲線就會係一條穿過（10 文，100 件）同（9 文，110 件）呢兩個點嘅線（唔一定係直線），而呢條曲線所表達嘅嗰段關係就係個需求^[2]。需求理論將個體消費者描述為理性嘅決策者，假設佢哋會嘗試用自己手上嘅有限資源（即係佢哋嘅收入）最大噉滿足自己嘅慾望－用行話講嘅話，就係喺有限嘅資源下將自身嘅效用（utility）最大化^[2]。

需求定律宣稱，是但搵個市場同是但一件貨品服務，假設第啲因素不變，佢價格同買家會買嘅量之間會形成負關係（條線嘅斜率 ${\displaystyle s}$ 係負數）－價格愈高買家就會買得愈少，而價格愈低買家就會買得愈多。呢條定律係稀缺性嘅必然結果：價格係啲買家每買一件就要付出嘅資源量，所以一件貨品服務嘅價格乘需求量（買家有能力又肯買嘅量）反映買家有能力付出幾多資源嚟買件貨品服務，但錢係一樣有限嘅資源，所以價格 ${\displaystyle P}$ 同需求量 ${\displaystyle Q}$ 乘埋出嗰個數（${\displaystyle P\times Q}$）一定係一個有限嘅數值；如果條需求曲線係由頭到尾都打橫（${\displaystyle s=0}$）、打直（${\displaystyle s=\infty }$）或者成正斜率（${\displaystyle s>0}$）嘅話，就會出現價格同需求量乘埋個數可以係無限大嘅情況，所以如果錢有稀缺性，噉需求曲線只可以係一條斜率係負數嘅線^[3]。

某啲外界因素可以改變一個需求：收入可以影響需求－如果啲買家嘅收入突然間普遍升嘅話，噉通常會引致條需求曲線向右移（買家無論價格幾高都買多咗嘢），而相反，如果啲買家收入突然普遍跌嘅話，噉通常會引致條需求曲線向左移（買家無論價格幾高都買少咗嘢）^[4]；替代品嘅價格都可以改變需求，例如如果家吓 SONY 提高佢啲商品嘅價格，搞到由佢生產嘅 PS4 遊戲機價格上升，噉啲買家對任天堂 Switch（由任天堂出嘅遊戲機）嘅需求會提升（條需求曲線向右移）－PS4 價格上升令少咗人買 PS4，而任天堂 Switch 同 PS4 一樣，可以滿足啲人打機嘅慾望（係 PS4 嘅替代品），所以就算任天堂 Switch 嘅價格唔變都好，啲人都會買多咗^{[註 1][註 2][5]}。

喺現實應用當中，經濟學家會用各式各樣嘅方法嚟做需求預測：喺最簡單嗰種情況下，佢哋可以做個問卷調查，派問卷俾啲消費者，問佢哋「如果件貨品服務係呢個價錢，你會買幾多件」等嘅問題，再將消費者嘅答覆畫成圖表（Y 軸係價格，X 軸係需求量），跟住做個迴歸分析（簡單啲講就係一種分析方法，能夠靠手上數據畫出反映兩個變數之間嘅關係嗰條線^[6]），結果會得出一條估計嘅需求曲線。需求預測嘅技術喺營銷策略上好有用，可以幫到企業家知道喺每個價格件貨品服務會賣到幾多件，並且靠噉估計件貨品服務要設喺乜嘢價格先可以令利潤最大化^[7]。

供應

内文：供應

供應係指件貨品服務嘅價格同供應量（指賣家肯整嚟賣嘅量）之間嘅關係。例如假想一件貨，佢價格喺 10 文嗰陣啲生產商總共會生產 100 件，價格喺 9 文嗰陣啲生產商總共會生產 90 件... 等等嘅話，噉呢個價格同供應量之間嘅關係就係件貨嘅供應。對生產者嚟講，佢哋賣一樣貨品服務嘅所得等如件貨品服務嘅價格乘以所賣嘅量，所以一般嚟講，如果假設生產者係理性噉想自己嘅所得最大化嘅話，佢哋會嘗試生產同供應令到佢哋利潤最大化嘅貨品服務，而噉通常就示，假設第啲因素（例如生產成本）不變，一件貨品服務嘅價格愈高，啲生產者賣佢就愈會賺到錢，就愈會肯生產佢－是但搵條供應曲線嚟睇，佢嘅斜率都會係正數，呢條就係所謂嘅供應定律^[8]。

同需求同一道理，外在嘅因素可以影響一個供應：例如如果生產科技上有突破或者工人嘅人工跌，令一件貨嘅生產成本下降嘅話，噉通常條供應曲線會向右移（就算價錢不變，啲生產商都會生產多咗）；而如果工人嘅人工升，搞到生產成本上升嘅話，噉通常條供應曲線會向左移（就算價錢不變，啲生產商都會生產少咗）^[8]。

均衡

市場均衡嘅圖示；P₀－均衡價格；
A－需求量太大，P < P₀；
B－供應量太大，P > P₀。

内文：市場均衡

均衡（equilibrium）係指供應量同需求量相等嘅一種狀態，即係喺幅供應需求圖入面供應曲線同需求曲線相交嗰一點。

• 當一件貨品服務嘅價格低過佢嘅均衡點嗰陣，需求量會大過供應量，所以會出現短缺；
• 而當件貨品服務嘅價格高過均衡點嗰陣，供應量會大過需求量，所以會出現盈餘。

喺短缺發生嗰陣，通常啲買家就會爭貨，鬥俾高價錢買－就會推高個價，而喺盈餘發生嗰陣，啲賣家就要賤買手上嘅存貨－就會撳低個價。所以供應同需求理論亦都預測咗，長遠嚟講，任何一個貨品服務如果外在因素不變，佢個價格係會慢慢噉趨向均衡狀態，令到個供應量同需求量最後變成相等嘅，而當有某啲外在因素改變搞到成條供應曲線或者成條需求曲線有所改變嗰陣，個均衡價格會跟住變^[9]。

彈性

内文：彈性 (經濟學)

彈性（elasticity）喺經濟學上係需求同供應可以有嘅一種屬性，指需求量同供應量對價格改變幾有反應^[10]。需求同供應彈性可以用以下呢條式計：

${\displaystyle e_{\langle p\rangle }={\frac {\mathrm {d} Q/Q}{\mathrm {d} P/P}}}$；

當中 ${\displaystyle P}$ 係件貨品服務嘅價格，${\displaystyle Q}$ 係件貨品服務嘅需求量（如果考慮緊嘅係需求）或者供應量（如果考慮緊嘅係供應），而 ${\displaystyle \mathrm {d} }$ 係指導數－簡單啲講就係變率^[10]。

舉個例說明，假想家陣有兩件貨品，X 同 Y，兩個條需求曲線都成直線，X 嗰條斜率高啲（需求彈性低啲），噉嘅話如果兩件貨品嘅價格同時上升 1 文，對 X 嘅需求量嘅跌幅會細過對 Y 嘅需求量嘅。即係話 X 嘅需求量對價格改變反應冇咁大－就算 X 價格變，消費者買嘅數量都冇變得咁明顯。X 需求彈性低啲可以係因為好多原因：例如可能 X 係一樣好似鹽同糖噉嘅生活必需品，所以就算 X 平咗，消費者都唔會太有動力買多啲，而 X 就算貴咗，好多消費者都仲係要焗住買咁多；Y 就可能係一啲好似魚子醬噉嘅奢侈品，Y 對消費者嚟講唔係生活必需嘅，所以佢價格一升，消費者可以索性唔買，但 Y 一平，就會好多消費者想買^[10]。

註釋

1. 順帶一提，如果家陣有兩件貨品，消費者對兩者嘅需求會一齊升或者一齊跌，噉呢兩件貨品就算係所謂嘅互補品（complementary）；例子有牙刷同牙膏。
2. 兩件貨品 ${\displaystyle A}$ 同 ${\displaystyle B}$ 係互補品定替代品可以用以下呢條式衡量：
   

   ${\displaystyle CG={\frac {\Pr(A\cap B)}{\Pr(A\cup B)}}\,}$

   ${\displaystyle \Pr(A\cap B)}$ 係「消費者買嗮兩件貨」嘅機率，而 ${\displaystyle \Pr(A\cup B)}$ 係「消費者買嗮兩件或者淨係買其中一件」嘅機率，如果 ${\displaystyle A}$ 同 ${\displaystyle B}$ 係互補品，${\displaystyle CG}$ 數值會大，而如果 ${\displaystyle A}$ 同 ${\displaystyle B}$ 係替代品，${\displaystyle CG}$ 數值會細。

引咗

1. Brody, A. (1987). "Prices and quantities". In Eatwell, John; Milgate, Murray; Newman, Peter. The New Palgrave Dictionary of Economics. The New Palgrave: A Dictionary of Economics (first ed.). p. 1.
2. The Demand Curve and How It Works. The balance.
3. Definition of 'Law Of Demand'. Economics Times.
4. O'Sullivan, Arthur; Sheffrin, Steven M. (2003). Economics: Principles in Action. Upper Saddle River, New Jersey: Pearson Prentice Hall. p. 79.
5. Retail Analytics: A Novel and Intuitive way of finding Substitutes and Complements. Towards Data Science.
6. Lindley, D.V. (1987). "Regression and correlation analysis," New Palgrave: A Dictionary of Economics, v. 4, pp. 120–23.
7. How to Estimate a Demand Curve.
8. The Supply Curve. ThoughtCo.
9. Dixon, H. (1990). "Equilibrium and Explanation". In Creedy. The Foundations of Economic Thought. Blackwells. pp. 356–394.
10. Price elasticity of demand and price elasticity of supply. Khan Academy.

睇埋

• 市場
• 市場學
• 經濟學
• 消費者