阿波沖海戰

阿波沖海戰（日文：あわおきかいせん），又叫兵庫沖海戰，係戊辰戰爭其中一場仗，同時係日本史上第一場用軍艦嚟打嘅海戰。

阿波沖海戰

經過

當鳥羽伏見之戰開始之後，薩摩藩（明治新政府個派）嘅軍艦春日丸、同埋另外兩艘運送船翔凰丸、平運丸停響兵庫港（即依家嘅神戶港），準備返去鹿兒島。同時之間，榎本武揚帶住幕府海軍嘅軍艦開陽丸停響大阪灣，為鳥羽伏見之戰留返個後門，等幕府軍士兵有個照應^[1][2]。

1868年1月28號（慶應4年1月4日），平運丸向明石海峽行，而春日丸同翔凰丸就行去紀淡海峽。呢個情況畀開陽丸見到，於是佢就開空炮要求停止航行，但係冇人理佢，所以佢就進入打仗狀態。佢開始對春日丸同翔凰丸追擊，開陽丸同埋春日丸分別互相開咗25同18發，不過就對兩方都冇乜影響^[1][3]。

因為春日丸嘅目標根本唔響打仗嗰到，加上佢又開得快，所以就成功走返鹿兒島。但係另一艘軍艦翔凰丸就冇咁好彩，響走嘅途中機關故障，因為艦長驚畀幕府軍捉咗而燒咗架軍艦，船員就全部成功上岸。榎本武揚知道後，就好欣賞佢^[4][5]。不過，春日丸響呢場仗入面，佢嘅機關功能都受咗傷，但日本國內都修理唔到佢，所以響三個月後響英國生意人嘅幫助下，到咗上海修理^[6][2]。

本身幕府軍係贏咗嘅，但最後佢哋徹退，所以近畿地方嘅制海權就「送」咗畀明治新政府。後人為咗紀念呢場仗，就響德島縣（前身係阿波國）起咗「阿波沖海戰小公園」^[7][5]。

攷

1. 〈四国風物選 蒲生田岬（四国最東端の岬），蒲生田大池，阿波沖海戦〉。map46-2.com。喺2020-11-21搵到。
2. 保谷徹 (2007)。《戦争の日本史18　戊辰戦争》。吉川弘文館。ISBN 978-4642063289。
3. 〈「明治１５０年 徳島の古文書で見る明治維新」展を企画して | 国立公文書館〉 (日文)。喺2020-11-21搵到。
4. 〈阿波沖海戦〉。contest.japias.jp。喺2020-11-21搵到。
5. 〈[徳島県]阿波沖海戦小公園（美波町・旧由岐町）〉。《みんカラ》 (日文)。喺2020-11-21搵到。
6. 〈阿波沖海戦〉。paperzz.com。喺2020-11-21搵到。
7. 〈阿波沖海戦小公園 : 陸の孤島だより～美波町由岐ナビ～〉。www.minamicho.info。原著喺2020-11-28歸檔。喺2020-11-21搵到。