喺葵青區嘅公共屋邨 From Wikipedia, the free encyclopedia
長青邨(Cheung Ching Estate)係香港青衣島上第一條公共屋邨。佢響島上東面山上,1974年開始興建,1977年入伙。長青邨係甲型公屋。屋邨辦事處設響青槐樓,現由宜居物業管理有限公司負責屋邨管理。
| ||||
![]() 長青邨雙塔型樓 | ||||
地區 | 葵青區 | |||
---|---|---|---|---|
類型 | 租住屋邨 | |||
入伙年期 | 1977年-1983年 | |||
樓宇座數 | 8 | |||
單位數目 | 4907 | |||
面積呎數 | 229 - 591 呎(ft²) | |||
伙數 | 4731 | |||
居民 | 16423 | |||
網站 | 無 |
長青邨當初係青衣新區公共屋邨第一期,其後二三四五期,則命名為長康邨,同長青邨分開管理。
長青邨地方行政上歸入葵青區。
長青邨響青衣島東岸山上,東望葵涌青洲以及葵涌貨櫃碼頭同醉酒灣,同對岸隔個藍巴勒海峽。有青衣大橋同葵青橋駁去對岸。
由於響山上,八棟樓高低位置差異好大,佈置比較分散,可分成三個部份。一係南面山腰,原本係一個細啲山頭,高268呎。二係中間山頂,高約莫三百幾呎。三係北部山谷,高約二百呎樓下。
未有長青邨之時,因為係山頭,未見經傳有人於此定居。長青邨南面山腳,近海之處,係一個叫大灣嘅地方,有村民居住。而西面有細山一谷,亦有同名村落,有人定居。而北面山谷個位,有名下高灘,相信都有過村落。
山上曾經有過墓,建於大明。及後其後人聞得香港政府會開山發展,急忙遷葬墓穴於他處。
1960年代,香港政府,將原本響港島同九龍市區嘅重工業,遷入青衣島南部同西部。其中將長青邨現址南面大灣填海,填地做油庫。同時間,島上幾間大商家同政府達成協議,由商家夾錢起橋,起好之後交畀香港政府。香港政府亦計劃將荃灣衞星城市範圍,擴大到青衣島。打算第一步由大橋起,起公共屋邨。
1974年,青衣大橋落成。隨即起長青邨,由1977年到1979年,一共起咗七座。落成時間順住南向北。
首先落成一批係南面山腰三棟,即係青槐樓,青榕樓,同青葵樓,全部1977年入伙。響青葵樓同青榕樓之間,重有長青邨商場,包括街市同停車場。
青槐樓早年設有派出所,有警察駐守。而青槐樓側邊嘅露天停車場,亦長青邨第一個巴士站兼巴士總站。
跟住落成係山頂兩座,即係青松樓同青柏樓,都係1977年落成。除咗樓同商場,同時間重有四邑商工總會嘅陳黎繡珍紀念學校同埋顯主女修會嘅郭怡雅神父紀念學校。
北部山谷一帶,青梅樓喺1978年入伙,而青楊樓則響1979年入伙。同期間另有衞理信小學同佛敎葉紀南中學。
由於長青邨擴展到七座樓,長青巴士總站亦青槐樓,向北搬到青康路現址。而南面三座,響長青邨商場外,另設巴士站。
為咗配合青衣塘填海,原本塘上嘅水上人,香港政府要諗辦法安置。最後房屋署響青葵樓側邊,起多棟青桃樓。
由於青衣新區多咗咁多人,政府亦安排志願機構建立社區服務。首先,香港基督敎女青年會,1980年左右,響青榕樓地下建立青衣社會服務處,而之後香港小童羣益會,亦響青葵樓二字樓建立長青兒童中心同埋長青兒童圖書館。而幼兒服務,有四字樓嘅青葵幼稚園同三字樓,香港挪威信義會嘅長青托兒所。
而巴士總站則邊,長青社區中心,亦響1985年左右落成。主要搬入有香港基督敎女青年會,長青幼稚園同埋長青社會服務處,下設圖書館同自修室。
長青邨有八棟樓,當中七棟係1970年代嘅樓,唯獨青桃樓係1980年。長青邨樓按青字加樹名而名。
青槐樓,青榕樓,青松樓,青柏樓,青梅樓同青楊樓,全部係雙塔型。而青葵樓同青桃樓,都係舊長型,外牆鋪有紙皮石。
雙塔型樓,分成兩四方型通心塔,中間有電梯大堂相連。一邊廿四層,一邊廿二層。
按地勢高低,分成上四座同下四座。下四座把南部嘅樓,最初只有青槐,青榕,同青葵,叫下三座。後尾加入青桃,叫下四座。而上四座指青松,青柏,青梅,同青楊。