From Wikipedia, the free encyclopedia
錦綸會館（粵拼：gam2 leon4 wui6 gun2）係中國廣東省廣州市嘅一間古代建築，喺荔灣區康王南路嘅西來一巷口嗰度，隔籬冇幾遠就係華林寺同華林玉器商業街。呢間嘢既係成個廣州入面，唯一一間到而家都重喺度嘅行業會館；又係見證中國海上絲綢之路嘅緊要地區同埋全球第一間連地基都可以完整平移嘅文物建築。
其實呢間嘢喺清朝嘅雍正元年（1723年）由廣州絲織業嘅伙記佢哋喺西關地區度出錢起嘅，佢主要係用嚟做紡織業嘅波士開會嘅場所。嗰時喺每年年初，廣州絲織行業班老細就成日嚟呢度一齊傾吓絲綢商品嘅價錢同曬士之後，跟住運啲絲綢到廣州十三行嗰度，通過海上絲綢之路去到世界邊個地方都得。根據記載話，喺起緊錦綸會館嗰陣，負責捐錢嘅絲織業商鋪冧巴同個人，夾夾埋埋有成1338個咁多。不過佢喺1949年之後變咗民宅。
喺2001年，廣州為咗緩解人民路嘅大塞車，同埋荔灣區冇南北主幹道，而要起康王路。就喺嗰時，之前喺西來一巷入面嘅錦綸會館咁啱就經過嗰時規劃嘅康王路。後嚟為咗保存呢座咁有價值嘅文物建築，廣州市人民政府就出錢嚟裝修同保護，甚至將成間嘢移走。就喺2001年8月18號，成間錦綸會館托起1.085米之後就平移，先係向北移咗80.4米，跟住西移咗22米，最後喺2001年9月28號凌晨先至搞掂。呢次平移唔單止係全中國第一次成功平移磚木結構嘅古建築，亦係成個國際文物建築史上，成功平移建築嘅先例。
喺2005年，裝修過嘅錦綸會館又重新開返畀人入去睇。而家會館入面重擺咗嗰年平移用到嘅千斤頂、油泵同水準儀等工具同埋平移模型圖。喺2008年，呢間嘢列入咗廣東省文物保護單位。
呢間嘢有嘅建築面積有700㎡咁大，坐北向南，三路三進式嘅祠堂建築。入面嘅石刻、木雕、磚雕同埋陶塑、灰塑都體驗咗嶺南嘅建築風格。喺會館入面重留低咗廿二嚿碑刻響度，其中部分碑刻上都寫滿嗮起錦綸會館、負責捐錢裝修嘅商鋪冧巴同人名。
而家嘅錦綸會館係廣州嘅絲綢行業博物館嘅錦綸會館，除咗成日整嘅絲織行業歷史展覽之外，重養咗好多蠶蟲而整出嚟嘅蠶繭，等觀眾睇吓絲綢係點整嘅。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
