呢篇文介紹澳門路氹填海區路氹連貫公路附近（以路氹金光大道區域為主），長年有唔少街妓遊走，同嫖客接洽嘅現象。
 |
2007年—2010年
澳門威尼斯人——度假村——酒店响2007年8月28號下晝開張，其中嘅威尼斯人娛樂場係路氹城嘅首間賭場。
自此，出入該區嘅遊客數量大增，撈黃嘅人，紛紛走去揾食，臨近聖誕同新年等旺季時，佢哋會特別沓馬[1]。衣着性感誘人嘅流鶯，會喺上述物業嘅賭場同商場徘徊兜客，而雞頭則喺附近𥄫住[2]。看更週不時會趕佢哋走，然而冇幾耐又會返嚟。差人走嚟捉人嘅話，又容易俾負責睇水嘅同黨發現而吹雞散水。隨住呢啲人越嚟越多，騷擾到啲唔關事嘅居民同遊客，重牽涉更多偷渡、褪蝦籠同人口販賣等罪案[3]。
司法警察局指：佢哋首先用咗三個月，喺現場調查，之後派出咗130人，由2010年12月8號下晝至2010年12月9號上晝，喺嗰處郁手，拉咗112女20男嘅大陸人 。跟住，42女認咗係做雞，被移交至治安警察局，將被罰錢同遣返[4]。其餘嘅人，會轉移至檢察院處置——初步確認有17男7女係雞頭，嚟自廣西、湖南、湖北同黑龍江；流鶯嚟自唔同省份，有15個涉嫌用假證，亦有冇證、逾期逗留同偷渡者[5]。估計佢哋有同黨未落網[6]。呢個係操控賣淫集團，組織算幾嚴密，反偵查能力又高；啲同場嘅雞頭會避免同流鶯接觸，只會暗中記低佢哋接幾多客，用於拆賬，亦有啲唔係咁樣計條數，而係向佢哋每人收每日1000蚊嘅入場費或保護費，雞頭亦會租房畀流鶯同嫖客打炮；流鶯月入大概係三萬—五萬，而操控賣淫集團最少運作咗超過一年，估計每月賺到嘅錢以百萬計[7]。
《澳門日報》响2016年11月7日，報道其對於保安局局長黃少澤嘅專訪，後者認為，上段所講嗰單嘢大劑過葡京沙圈案[8]。
2010年—2015年
上述搜捕過後，淫業者一度偃旗息鼓，然而隔咗一排，又返返嚟。警察認為重係有犯罪集團喺背後操縱，即使不斷掃黃，都淨係捉到卒仔，幕後黑手依然逍遙法外，必須將跨境賣淫集團連根拔起，至會收拾到佢哋。
路氹城有更多賭場、酒店同商場等建築陸續落成開業，帶嚟更多遊客。唔少野雞會喺室外當街遊走揾客，佢哋由幾乎清一色係北姑，變到國籍種族多樣；亦有女裝野鴨。
响2014年12月4號上晝，澳門治安警察局嘅人，喺路氹金光大道一帶，捉咗19個女性打扮嘅懷疑娼妓——當中有14個係大陸女人，其中之一涉嫌非法入境同揸住偽造文件；又有5個菲律賓男人；由佢哋身上搜出大量避孕套、潤滑液同色情宣傳咭片等物品，可能涉及操控賣淫[9]。有外國傳媒推斷，呢次係迎接中共中央總書記習近平到訪嘅洗太平地行動[10]。
2015年—2020年
葡京沙圈响2015年1月10號𢫏旗之後，被稱為「舊沙圈」[11]。自此傳媒漸漸慣咗將呢篇文介紹嗰處叫做「新沙圈」[12]。澳門時事評論員譚志強分析道，路氹金光大道一帶具備形成沙圈街場地嘅條件——天時、地利同人和有齊；視乎嫖客同妓女嘅多寡，當後者有默契認為某處方便佢哋揾客，就會轉移陣地；而由於對操縱賣淫者嘅刑罰極重，好多馬伕嘅做嘢方法亦都改咗；而喺澳門，一個人賣淫並唔犯法；黃同賭兩個行業分唔開，妓女係當地旅遊業嘅重要部分，為賭客提供其他娛樂，長年吸引好多香港男人過大海，令該城長年以嚟都冇衰落[13]。
响夜晚，喺路氹連貫公路附近往往會有多國流鶯聚集；佢哋會自行用普通話及英文同途人洽談，並冇馬伕出面輔助[14]。
响2018年11月23號上晝，司法警察局派咗30人，去路氹金光大道一帶巡查，捉咗16個女裝嘅涉嫌賣淫者——12個大陸女人、3個泰國男人及1個菲律賓男人，其後統統交畀治安警察局接手[15]。
喺路氹新沙圈，發生過撈淫嘅人打拳頭交，及械鬥死人嘅事件[16]。
响2019年5月18號下晝，喺路氹金光大道四季酒店附近[17]，有兩幫雞頭，疑似為咗爭地盤而開刋[18]，4個大陸男人受咗刀傷——1個姓魏嘅瓜咗[19]，兇器係把摺刀，其餘嗰3個都要入廠[20]。到咗2019年5月25號，珠海公安已經喺大陸捉咗4個疑犯[21]，包括姓彭嘅首腦——佢哋都係大陸男人[22]；重有2個疑犯身分鎖定咗，不過仍然未落網[23]。
2020年—伊家
由於武漢肺炎入侵，該處遊客變得稀缺，淫業連帶遭殃[24]。澳門嘅所有賭場，同其他娛樂場所，被政府下令，由2020年2月5號子夜起停業15日[25]。之後又有一浪接一浪嘅防疫政策，令甚為依賴旅遊業同娛樂業嘅娼妓同馬伕，生意大受打擊[26]。
雖然繼續有呢行嘅人開工，但係作風比之前低調得多[27]。
- 本文所用貨幣為澳門圓。
- 「操控賣淫集團」唔包賣淫者，只計操控者。
- 正文提及嘅泰國男人同菲律賓男人，可能包括變性人；有傳媒界定其為人妖。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
