角色映襯

角色映襯（粵拼：gok3 sik1 jing2 can3；英文：character foil）係作故仔上常用嘅一種手法，指同兩個角色之間嘅差異嚟突顯佢哋嘅特徵：特徵好多時係相對嘅，例如話一個人「高」通常係指佢高過多數嘅人，所以將一個高嘅角色擺喺一個明顯矮過佢（而且矮過平均）嘅角色隔離會更加突顯得出佢高；呢一點就算係性格上嘅特徵都係一樣，話一個角色樂於助人係指佢比起一般人更加傾向鍾意幫人，所以（例如）如果故仔展示呢個角色幫助一個路人，同時另一個角色袖手旁觀，噉就更加突顯出前者「樂於助人」嘅性格特徵。

唐吉訶德（右）同佢嘅忠實隨從桑丘·潘薩（左）；兩個人一個高瘦一個肥矮，一個騎馬一個騎驢，一個係騎士一個係隨從^[1]。

因為噉，喺作故仔嗰陣，專業作家好多時都會將兩個角色擺喺一個情境當中，描寫兩者喺個情境當中嘅行動有乜嘢差異，靠噉突顯兩個角色嘅特徵^[2][3]。

詞源

英文 foil 呢個字原本意思係金屬箔（好薄嘅金屬片）噉解：喺歐美地區，賣寶石嘅商人傳統興將要賣嘅寶石攞喺金屬箔上面，用光澤相對唔閃唔靚嘅金屬箔嚟突顯嚿寶石有幾閃幾靚－後嚟英文字 foil 就俾人攞嚟指文學上用唔同角色之間嘅差異突顯角色特徵嘅寫作手法^[4]。

例子

• 兩個角色 A 同 B：A 著俾人同熱情想像埋一齊嘅紅色衫，B 著俾人同冷靜想像埋一齊嘅藍色衫（外型）；佢哋兩個一齊遇到一班敵人，A 即刻攞武器出嚟攻擊敵人，而 B 即刻攞部電腦出嚟分析形勢（行為）；上述映襯突顯 A 性格行動力強而 B 沉著同重視思考計劃^[5]。
• 兩個女性角色 A 同 B：A 鍾意著粉紅色裙，B 鍾意著牛仔褲（外型）；A 留長頭髮，B 剪短頭髮（外型）；A 鍾意做後援工作，幫手煮飯同照顧受咗傷嘅隊友，而 B 鍾意喺前線攞住格鬥武器同敵人打交（行為）；上述映襯突顯 A 比較傳統上陰柔而 B 係個男仔頭^[6]。

睇埋

• 角色
• 角色塑造
• 主角

攷

1. Corwin, Norman (1 April 1978). Holes in a stained glass window. L. Stuart.
2. Auger, Peter (August 2010). The Anthem Dictionary of Literary Terms and Theory. Anthem Press. pp. 114-.
3. Foil. Encyclopedia Britannica.
4. Definition of Foil.
5. Red Oni, Blue Oni 互聯網檔案館嘅歸檔，歸檔日期2020年2月23號，.. TV Tropes.
6. Tomboy and Girly Girl 互聯網檔案館嘅歸檔，歸檔日期2020年2月2號，.. TV Tropes.

拎

• （英文） Foil. TV Tropes.